.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 166
Hüküm no: 178
Orijinal metin no: [105-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Haim v. Aznavur’un Yakob v. Murad’a sattığı horasancı dükkânı hissesinin bedelinden kalan alacağı hususundaki davada sulh oldukları

Vilâyet-i Anadolu’da vâki‘ Arapgir sancağına tâbi‘ Eğin nâm kasaba sükkânından Haim? v. Aznavur nâm Ermeni meclis-i şer‘-i hatîr-i lâzımü’t-tevkīrde işbu râfi‘-i hâze’s-sifr Yakob v. Murad nâm Ermeni mahzarında takrîr-i kelâm edip Mahmiye-i İstanbul’da Hoca Paşa mahallesinde lede’l-ahâlî ve’l-cîrân ma‘lûmü’l-hudûd olan bir bâb horasancı dükkânının dört sehimden bir sehmin mezbûr Yakob’a on beş bin akçeye bey‘ edip üç bin akçesin alıp zimmetinde on iki bin akçe hakkım bâkī kaldı deyû da‘vâ ve taleb edip ve yine dükkân-ı mezbûrede hizmetkâr akçesi deyû bir tarîk ile on riyâlî guruşum dahi aldı deyû da‘vâ ve taleb eylediğimde, beynimizde münâza‘ât-ı kesîre ve muhâsamât-ı şedîde vâkı‘a olmuşdu el-hâletü hâzihî beynimize muslihûn tavassut edip dört riyâlî guruşa ıslâh eylediklerinde ben dahi sulh-ı mezbûru kabûl ve bedel-i sulh olan mârrü’z-zikr dört riyâlî guruşu mezbûr Yakob yedinden ahz u kabz eyleyip husûs-ı mezbûra müte‘allik cemî‘ de‘âvî ve mutâlebâtdan zimmetini ibrâ-i âm ile ibrâ ve ıskāt-ı tâm ile ıskāt eyledim, ba‘de’l-yevm husûs-ı mezbûra müte‘allik da‘vâ ve nizâ‘ sudûr ve zuhûr ederse lede’l-hükkâmi’l-kirâm mesmû‘a ve makbûle olmaya dedikde mukırr-ı merkūmun ikrâr-ı meşrûhunu el-mukarru lehü’l-mezbûr Yakob bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Muharremi’l-harâm li sene semânin ve erba‘în ve elf.


Şuhûdü’l-hâl: Ferhad v. Şahbaz, Cuvan v. Mercan, Yani v. Emrik?, Hader? v. Hırbed?, Asuzader? v. Mercan, Yakob v. Agop, Ferahzad? v. Polat, Külasız v. Bağdik?, Bahok? v. Serkis