.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 167
Hüküm no: 180
Orijinal metin no: [105-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Rumeli beylerbeyi Ali Paşa’nın kardeşi Mehmed Bey’in zeâmeti reâyâsından tahsil edilen ispençe vergisi bedeli hususundaki davada sulh olduğu

Vilâyet-i Rumeli’nde vâki‘ İlbasan kazâsına tâbi‘ karye-i Miraska ve Grabova ve Bersnik ve İşteni nâm karyeler sükkânından Mehmed b. Hızır ve İlyas b. Abdullah ve Muhzır? Hüseyin b. Hasan ve Ali b. İskender ve sâirlerinin taraflarından husûs-ı âti’l-beyâna vekîl olup nehc-i şer‘î üzre vekâletleri sâbite olan Kasım b. Abdullah ve Çakamete nâm kimesne[ler] mahfil-i kazâda [106] mefharü’l-e‘âzımi’l-kirâm muhtâru mülûki’l-İslâm ve umdetü’l-ümerâ’i’l-fihâm hâlen Rumeli beylerbeyisi olan Ali Paşa -yesserallâhu mâ yeşâ- hazretlerinin ağalarından zahrü’l-a‘yân İbrahim b. Mustafa Çavuş mahzarında ikrâr ve takrîr-i kelâm edip karye-i mezbûre re‘âyâsı mûmâ-ileyh Paşa hazretlerinin karındaşı kıdvetü’l-emâcid ve’l-ekârim Mehmed Bey hazretlerinin ze‘âmeti olmağın mezbûr İbrahim Çavuş müvekkilim mezbûrûn re‘âyâdan bin kırk yedi senesinin ispençesi ve sâir mahsûlünden kırk yedi bin akçe ahz u kabz eyleyip vekâletim hasebiyle mezbûr İbrahim Çavuş yedinden meblağ-ı mersûm kırk yedi bin akçeyi da‘vâ ve taleb edip suâl olundukda, merkūm İbrahim Çavuş müdde‘â-yı mezbûru inkâr ile cevâb verip beynimizde münâza‘ât-ı kesîre ve muhâsamât-ı şedîde vâkı‘a olmuşdu el-hâletü hâzihî beynimize muslihûn tavassut edip elli riyâlî guruşa ıslâh eylediklerinde biz dahi sulh-ı mezbûru kabûl ve bedel-i sulh olan elli riyâlî guruşu mezbûr İbrahim Çavuş yedinden vekâletimiz hasebiyle ahz u kabz eyleyip husûs-ı mezbûra müte‘allik cemî‘ de‘âvî ve mutâlebâtdan vekâletimiz hasebiyle zimmetini ibrâ-i âm ile ibrâ ve ıskāt-ı tâm ile ıskāt eyledik ba‘de’l-yevm husûs-ı mezbûr[a] müte‘allik da‘vâ ve nizâ‘ sudûr ve zuhûr ederse lede’l-hükkâmi’l-kirâm mesmû‘a ve makbûle olmaya dediklerinde vekîlân-ı merkūmânın ikrâr-ı meşrûhlarını el-mukarru lehü’l-mezbûr İbrahim Çavuş vicâhen tasdîk edicek mâ hüve’l-vâki‘ bi’t-taleb ketb olundu. Tahrîren fî evâili Muharremi’l-harâm li sene semânin ve erba‘în ve elf.


Şuhûdü’l-hâl: Ali Ağa b. Mehmed, Lokman Bey b. Abdullah el-Cündî, Mustafa Bey b. Hüseyin el-Cündî, Mehmed Efendi b. Abuzer, Ali b. Abdullah