.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 169
Hüküm no: 182
Orijinal metin no: [106-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Murad v. Semagon’un Eğin’deki evi ile bağını Semagon v. Murad’a sattığı

Vilâyet-i Anadolu’da vâki‘ Arapgir sancağına tâbi‘ Eğin nâm kasaba sükkânından Murad v. Semagon [nâm] Ermeni meclis-i şer‘-i hatîr-i lâzımü’t-tevkīrde işbu râfi‘-i hâze’s-sifr Semagon v. Murad nâm Ermeni mahzarında bi’t-tav‘i’s-sâf ikrâr ve takrîr-i kelâm edip kasaba-i mezbûrede vâki‘ bir tarafı Serkis v. Azad bağı ve bir tarafı Henri v. Serkis bağı ve bir tarafı Fetan v. Tamur bağı ve bir tarafı Mercan v. Fedi bağı ile mahdûd ve mümtâz olan bir kıt‘a mülk bağımı ve yine kasaba-i mezbûrede vâki‘ lede’l-ahâlî ve’l-cîrân ma‘lûmü’l-hudûd olan bir bâb tahtânî ve bir bâb fevkānî mülk menzilimi merkūm Samagon’a safka-i vâhide ile yetmiş altı riyâlî guruşa bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve mebî‘eyn-i mersûmeyni mahallinde kabza taslît eyledim, keyfemâ yeşâ ve yehtâr mutasarrıf [107] olsun dedikde mukırr-ı merkūmun ikrâr-ı meşrûhunu el-mukarru lehü’l-mezbûr Samagon bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Muharremi’l-harâm sene semânin ve erba‘în ve elf.


Şuhûdü’l-hâl: Ali Beşe b. Abdullah, Mehmed Beşe b. Mehmed er-Râcil, Asuzader? v. Mirek?, Haçuk? v. Mirek?, Ferhad v. Şahbaz, Ciran v. Murad, Azad? v. Polat, Serkis v. Azad?, Yakob v. Agop, Arıcan? v. Avanes? ve gayruhüm