.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 169
Hüküm no: 184
Orijinal metin no: [107-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Beytülmâl emîninin vefat eden Hatice bt. Abdullah’ın terekesinden beytülmâl hissesini tahsil ettiği

Havâss-ı aliyye kazâsına tâbi‘ Hasköy’de subaşı ve beytülmâl emîni olan Muslu Bey b. Abdülmennân nâm kimesne meclis-i şer‘-i hatîr-i lâzımü’t-tevkīrde işbu bâ‘is-i hâze’l-kitâb Mustafa b. ( ) nâm kimesne mahzarında takrîr-i kelâm [edip] bundan akdem karye-i mezkûre mahallâtından Ahmed Çelebi mahallesinde sâkine iken vefât eden Hatice bt. Abdullah nâm hâtunun zevci olup muhallefâtının nısfına vaz‘-ı yed eyleyip mezbûr Mustafa’dan gayrı zâhirde vâris-i ma‘rûfu olmamağın emânetim hasebiyle mezbûrenin nısf-ı muhallefâtından bana iki yüz akçe isâbet edip meblağ-ı mezbûru tehâ[rü]c-i şer‘î tarîkiyle merkūm Mustafa yedinden bi’t-tamâm ahz u kabz eyleyip husûs-ı mezbûra müte‘allik cemî‘ de‘âvî ve husûmât ve mutâlebât ve eymândan mezbûr Mustafa’nın zimmetini ibrâ-i âm ile ibrâ ve ıskāt-ı tâm ile ıskāt eyledim, ba‘de’l-yevm husûs-ı mezbûra müte‘allik da‘vâ ve nizâ‘ sudûr ve zuhûr ederse lede’l-hükkâmi’l-kirâm mesmû‘a ve makbûle olmaya dedikde mukırr-ı merkūmun ikrâr-ı meşrûhunu el-mukarru lehü’l-mezbûr Mustafa bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Muharremi’l-harâm li sene semânin ve erba‘în ve elf.


Şuhûdü’l-hâl: Mahmud Çelebi b. Mehmed es-Serrâc, Abdi Bey b. Şaban es-Serrâc, Ali Dede b. Hüseyin, Hasan b. Uğurlu, Ali Beşe b. Abdullah ve gayruhüm