|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 170 Hüküm no: 185 Orijinal metin no: [107-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Rus asıllı Yusuf’un köle olmayıp azat edildiğinin tespiti
Havâss-ı aliyye kazâsı muzâfâtından Kağıthâne nâm karyede sâkin açık kaşlı gök elâ gözlü küçük emred Rûsiyyü’l-asl Yusuf b. Abdullah nâm emred mahfil-i kazâda kendiye mülkiyet zu‘mu ile vâzı‘u’l-yed eden Halil b. Abdullah nâm kimesne mahzarında takrîr-i da‘vâ edip gemici tâ’ifesinden Kara Mustafa ve Kara Ahmed nâm kimesnelerin abd-i memlûkleri olmağın beni i‘tâk ve tahrîr eylemişlerdir, mezbûr Halil bana vech-i şer‘î üzre vaz‘-ı yed edip mâlikâne tasarruf eder, yed-[i] kasr ve izâle olunmak taleb ederin dedikde, gıbbe’s-suâl merkūm Halil cevâbında mevsûf-ı mezkûr ile mevsûfe olan mezbûr Yusuf’u bir maraza mübtelâ olup hasta olmağın sâhibleri olan merkūmân Kara Mustafa ve Kara Ahmed nâm kimesnelerden on beş riyâlî guruşa iştirâ eyledim, mülk-i müşterâm olmak üzre tasarruf ederim, mu‘tak olduğu ma‘lûmum değildir deyû inkâr ile cevâb vericek, gulâm-ı mezbûrdan da‘vâsına mutâbık beyyine taleb olundukda udûl-i müslimînden Hasan Çelebi b. Mahmud ve Mehmed b. Hasan nâm kimesneler li ecli’ş-şehâde mahfil-i kazâya hâzırân olup fi’l-hakīka gemici tâ’ifesinden merkūmân Kara Mustafa ve Kara Mehmed mevsûf-ı mezkûr [108] ile mevsûfe olan mezbûr Yusuf[‘u] bizim huzûrumuzda i‘tâk ve tahrîr eylemişlerdir, biz bu husûsa şâhidleriz şehâdet dahi ederiz deyû edâ-i şehâdet-i şer‘iyye ettiklerinde, ba‘de’t-ta‘dîl ve’t-tezkiye şehâdetleri hayyiz-i kabûlde vâkı‘a oldukda emred-i mezbûrun ıtkına hüküm birle mâ hüve’l-vâki‘ bi’t-taleb ketb olundu. Tahrîren fî evâili Muharremi’l-harâm li sene semânin ve erba‘în ve elf.
Şuhûdü’l-hâl: Yusuf Efendi b. Behram el-Hatîb, Mehmed Çelebi b. Ömer Usta, Ahmed Çelebi b. Ali, Mehmed b. İsmail ve gayruhüm
|