|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 171 Hüküm no: 186 Orijinal metin no: [108-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mosi v. Salamon’un câriyesi Yarisa’yı beş yıllık hizmetini tamamladığında hür olmak üzere mükâtebe yoluyla azat ettiği
Havâss-ı aliyye kazâsına tâbi‘ Hasköy’de sâkin Kataran cemâ‘atinden Mosi v. Salamon nâm Yahudi meclis-i şer‘-i hatîr-i lâzımü’t-tevkīrde silk-i mülkümde münselik olan orta boylu açık kaşlı gök elâ gözlü ve sağ kolunda eser-i cerh olan Koroniyyetü’l-asl Yarisa bt. Lecko? nâm câriye-i memlûkesinin muvâcehesinde ikrâr ve takrîr-i kelâm edip sıfat-ı mezkûre ile mevsûfe olan câriye-i memlûkemi târih-i kitâbdan beş sene-i kâmile tamâmına değin bana sadâkat ve istikāmet ile edâ-i hizmet etmek üzre kitâbete kestim, ba‘de’l-yevm bana müddet-i madrûbe tamâmına değin hizmet edip müddet-i mezbûre tamâmında sâir ahrâr-ı asliyyîn gibi hürre olsun dedikde mukırr-ı merkūmun ikrâr-ı meşrûhunu el-mukarru leha’l-mezbûre câriye bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Muharremi’l-harâm li sene semânin ve erba‘în ve elf.
Şuhûdü’l-hâl: Mehmed Efendi b. Abuzer, Mehmed b. Abdullah, Ali Beşe b. Abdullah, Mihal v. Yani, Haron v. İsrâyil, David v. Yasef, Mihal v. Yasef, Zaharya v. İstekno, Dimitri v. Bedro ve gayruhüm
|