.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 171
Hüküm no: 187
Orijinal metin no: [108-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Vefat eden Receb’in tasarrufundaki vakıf odanın kızı Müslime’ye intikal ettiği ve odayı kullanan Gülistan’ın çıkması gerektiği

Vilâyet-i Anadolu’da vâki‘ İnebolu kazâsına tâbi‘ Çamlıca nâm karye sükkânından iken Havâss-ı aliyye muzâfâtından Hasköy’de merhûm Pîrî Paşa mahallesinde merhûm-ı merkūm vakfından bir bâb odayı icâre-i mu‘accele ve müeccele ile mutasarrıf iken Revan seferinde fevt olan merhûm Receb b. Mustafa’nın kazâ-i merkūmda vâki‘ sulbiye sagīre kızı Müslime’ye kıbel-i şer‘den mansûb vasîsi olup ammi olan Hüseyin b. Mustafa mahfil-i kazâda müteveffâ-yı mezbûr[un] hâl-i sıhhatinde mutasarrıf olduğu odada sâkine Gülistan bt. Abdullah nâm hâtun mahzarında üzerine takrîr-i da‘vâ edip müteveffâ-yı merkūmun zevcesi olup sâlifü’z-zikr odanın hakk-ı tasarrufu babası Receb’den sagīre-i mezbûreye intikāl etmiş iken mezbûre Gülistan bi-gayr-ı vechin şer‘î tasarruf eder suâl olunup yed-i âdiyesini kasr ile tenbîh olunması matlûbumdur dedikde gıbbe’s-suâl mezbûre Gülistan cevâbında sâlifü’z-zikr odanın hakk-ı tasarrufunu üç bin akçe bedel-i tefvîz mukābelesinde müteveffâ-yı mezbûr bana ferâğ eyledi deyip gıbbe’l-inkâr takrîr-i da‘vâsını mütebeyyine beyyine taleb olundukda ikāmet-i beyyineden izhâr-ı acz etmeğin kasr-ı yed ile tenbîh olunup mâ hüve’[l-vâ]ki‘ bi’t-taleb ketb olundu. Tahrîren fî evâili Muharremi’l-harâm li sene semânin ve erba‘în ve elf.


Şuhûdü’l-hâl: Mehmed Efendi b. Hızır el-İmâm, Süleyman Efendi b. Mirza el-İmâm, Mehmed Efendi b. Mehmed el-Hatîb, Şahin Bey? b. Abdullah