|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 172 Hüküm no: 188 Orijinal metin no: [108-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Dimo v. Mihal’in ortak olduğu meyhânedeki sermâyesini alarak ortaklıktan ayrıldığı
Havâss-ı aliyye kazâsına tâbi‘ Hasköy’de sâkin meyhâneci tâ’ifesinden Dimo v. Mihal nâm zimmî meclis-i şer‘-i hatîr-i lâzımü’t-tevkīrde işbu râfi‘-i hâze’s-sifr Mihal v. Yani nâm zimmî muvâcehesinde bi’t-tav‘i’s-sâf [109] ikrâr ve takrîr-i kelâm edip mezbûr Mihal ile Haron nâm Yahudinin meyhânesinde meyhânecilik san‘atında şerîk olup müfârekat ettiğimizde ba‘de küllî hesâb sermâyem elli yedi bin akçe olup meblağ-ı mezbûr elli yedi bin akçeyi mezbûr Mihal yedinden bi’t-tamâm ve’l-kemâl ahz u kabz eyledim sâlifü’z-zikr meyhâne içinde olan sermâyeye ve şirkete müte‘allik alâka ve medhalim kalmadı dedikde mukırr-ı merkūmun ikrâr-ı meşrûhunu el-mukarru lehü’l-mezbûr Mihal bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Muharremi’l-harâm li sene semânin ve erba‘în ve elf.
Şuhûdü’l-hâl: Mustafa çorbacı b. Mehmed, Abdi Bey b. Şaban es-Serrâc, İbrahim b. ..? Ali, el-Hâc Behmen b. Abdullah, Mahmud Çelebi b. Mehmed es-Serrâc, Mustafa b. Mehmed, Hristo v. Reis, Ferhad v. Şahbaz, Yanaki v. Dimitri
|