|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 172 Hüküm no: 189 Orijinal metin no: [109-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Vefat eden Todoraki v. Yani’nin câriyesini sağlığında azat ettiği
Mahmiye-i İstanbul hısnı ebvâbından Fener kapısı hâricinde vâki‘ Abdi Subaşı mahallesinde sâkin iken mürd olan Todoraki v. Yani nâm zimmînin câriye-i memlûkesi olan işbu bâ‘iset-i hâzihi’s-sifr orta boylu açık kaşlı gök elâ gözlü sarışın sol gözünün kapağında et beni ve sağ ayağı leke olan Koroniyyetü’l-asl Kahte? bt. Yorgi nâm câriye-i memlûkesi meclis-i şer‘-i hatîr-i lâzımü’t-tevkīrde mürd-i mezbûrun zevce-i metrûkesi olan Sultane bt. Dimitri nâm zimmîyye mahzarında kendi tarafından asâleten ve sulbî sagīr oğulları Yorgi ve Manol ve Toma ve sulbiye sagīre kızları Kasrandre ve Varnose ve Ezmerağda nâm zimmîlerin vasîsi olmağın sagīrûn-ı mezbûrûn tarafından vesâyeten takrîr-i da‘vâ edip ben mürd-i mezbûrun câriye-i memlûkesi olup beni hâl-i hayâtında ve kemâl-i akl-ı sıhhatinde hasbeten lillâhi’l-hallâk tahrîr ve i‘tâk etmişdi hâlen ben sâir ahrâr-ı asliyyîn gibi hürre olmuşken mezbûrlar bana mâlikâne tasarruf ederler, suâl olunup yed-i âdiyesi kasr ile tenbîh olunması matlûbumdur dedikde, gıbbe’s-suâl mezbûre Sultane asâleten ve vesâyeten ıtk-ı mezbûru inkâr edicek müdde‘iye-i mezbûre câriyeden da‘vâsına mutâbık beyyine taleb olundukda Havâss-ı aliyye kazâsına tâbi‘ Hasköy’de sâkin zimmî tâ’ifesinden Mihal v. Yani ve Papa Partin v. Anton nâm zimmîler li ecli’ş-şehâde mahfil-i kazâya hâzırân olup fi’l-vâki‘ mürd-i merkūm hâl-i hayâtında ve kemâl-i akl-ı sıhhatinde câriye-i memlûkesi olan mevsûfe-i mezkûreyi bizim huzûrumuzda i‘tâk ve tahrîr eyledi, biz bu husûsa şâhidleriz şehâdet dahi ederiz deyû edâ-i şehâdet-i şer‘iyye ettiklerinde, şehâdetleri ba‘de ri‘âyet-i şerâ’iti’l-kabûl hayyiz-i kabûlde vâkı‘a olmağın kasr-ı yed ile tenbîh olunup mâ hüve’l-vâki‘ bi’t-taleb ketb olundu. Tahrîren fî evâili Muharremi’l-harâm li sene semânin ve erba‘în ve elf.
Şuhûdü’l-hâl: Ali Beşe b. Abdullah, Kiryaki v. Yani, Deyos? v. Me[h]med? ve gayruhüm
|