|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 173 Hüküm no: 190 Orijinal metin no: [110-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Halil Beşe’nin köy dışında bulduğu Yusuf adlı hastalıklı çocuğu evlatlık edinip bakımını üstlendiği
Havâss-ı aliyye kazâsına tâbi‘ Kağıthâne nâm karye sükkânından Halil Beşe b. ( ) nâm kimesne mahfil-i kazâya gelip takrîr-i kelâm edip işbu meclisde mevcûd olup tahmînen on yaşında olup lâkin bir maraza mübtelâ olup hasta ve sâhib-i firâş olup kisb ü kâra iktidâr[ı] olmamağın Yusuf tesmiye olan sagīri karye-i mezkûr kurbunda bulup ihzâr eyledim, velîsi olmamağın tebennî ve terbiye için bana kıbel-i şer‘den teslîm olunup nafakasıçün alâ men lehû hakku’t-taleb bir mikdâr akçe karz takdîr olunmak taleb ederin dedikde, nidâ-i âm ettirilip sagīr-i mezbûrun ekāribinden üzerine şer‘an infâk lâzım olur kimesne bulunmamağın hâkim-i muvakki‘u’l-kitâb -tûbâ lehû ve hüsnü-me’âb- hazretleri velâyet-i âmmesi hasebiyle sagīr-i mezbûr merkūm Halil’e teslîm olunup ol dahi tebennî ve terbiye için alıp tesellüm ettikden sonra nafaka ve kisve ve sâir levâzım-ı zarûriyesi için yevmî beşer akçe takdîr olunup istidâneye ve sagīr-i mezbûrede min ba‘d sagīr-i mezbûr için hak taleb eder kimesneye rücû‘a izin verilip mâ vaka‘a gıbbe’t-taleb ketb olundu. Tahrîren fî evâili Muharremi’l-harâm li sene semânin ve erba‘în ve elf.
Şuhûdü’l-hâl: Yusuf Efendi b. Bayram el-Hatîb, Mehmed Çelebi b. Ömer Usta, Ahmed Çelebi b. Ali, Mehmed b. İsmail ve gayruhüm
|