.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 175
Hüküm no: 194
Orijinal metin no: [111-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mustafa Çelebi b. Osman’ın ölen ortağı Arzhan? v. Serkis’in hakkını yetimlerinin vasîsine ödediği

Havâss-ı aliyye kazâsına tâbi‘ Hasköy’de sâkin kiremitçi tâ’ifesinden Mustafa Çelebi b. Osman nâm râcil meclis-i şer‘-i hatîr-i lâzımü’t-tevkīrde bundan akdem mürd olan Arzhan? v. Serkis nâm mürdün sulbî sagīr oğlu Serkis ve sadriye sagīre kızı Meryem nâm sagīrlerin vasîyy-i şer‘îsi olan karındaşı Misak nâm Ermeni muvâcehesinde takrîr-i kelâm edip mürd-i mezbûr ile kiremitçilik san‘atında şerîk olup ba‘de küll-i hesâb zimmetinde sekiz bin sekiz yüz akçe olup meblağ-ı mezbûr sekiz bin sekiz yüz akçeyi vasîyy-i mezbûr Misak’a teslîm edip ol dahi vesâyet hasebiyle tesellüm ve kabz ve kabûl eyledi, ba‘de’l-yevm zimmetimde mürd-i mezbûrun bir akçe ve bir habbe hakkı kalmadı dedikde mukırr-ı merkūmun ikrâr-ı meşrûhunu vasîyy-i merkūm dahi bi’l-muvâcehe tasdîk ve bi’l-müşâfehe tahkīk edicek mâ vaka‘a bi’t-taleb ketb olundu. Tahrîren fî evâhiri Muharremi’l-harâm li sene semânin ve erba‘în ve elf.


Şuhûdü’l-hâl: Ferhad v. Şahbaz, Ağanes v. Emrik?, Harib? v. Asuzader, Asuzader v. Emrik? ve gayruhüm