|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 175 Hüküm no: 195 Orijinal metin no: [111-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mihal v. Yani’nin ortak ekmekçilik yaparken ayrıldığı Angeli v. Yani’de kalan alacağının ödenmesi gerektiği
Havâss-ı aliyye kazâsına tâbi‘ Hasköy’de sâkin ekmekçi tâ’ifesinden Mihal v. Yani nâm zimmî meclis-i şer‘-i hatîr-i lâzımü’t-tevkīrde Angeli v. Yani nâm zimmî muvâcehesinde üzerine takrîr-i da‘vâ edip bundan akdem mezbûr Angeli ile ekmekçilik san‘atında şerîk olup müfârekat ettiğimizde ba‘de küll-i hesâb zimmetinde yirmi bir bin beş yüz yetmiş akçe hakkım bâkī kalmışdır vermede te‘allül eder suâl olunup alıverilmesi matlûbumdur dedikde, gıbbe’s-suâl mezbûr Angeli cevâbında fi’l-hakīka mezbûr Mihal ile ekmekçilik san‘atında şerîk olup müfârekat e[t]tiğimizde ba‘de küll-i hesâb zimmetimde yirmi bir bin beş yüz yetmiş akçe hakkı bâkī kalmışdır deyû bi’t-tav‘ ve’r-rızâ ikrâr ve i‘tirâf edicek meblağ-ı mezbûrun edâsına tenbîh birle mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâlis ve’l-ışrîn min Muharremi’l-harâm li sene semânin ve erba‘în ve elf.
Şuhûdü’l-hâl: Halil Beşe b. İbrahim, Mustafa b. Ahmed, Mustafa b. Abdünnebi, el-Hâc Sinan b. Abdullah, Ali Beşe b. Abdullah, Yorgi v. Menkür?
|