.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 176
Hüküm no: 196
Orijinal metin no: [111-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Onnes v. Emircan’ın ölen kardeşinin mirasçısı olmadığı zannıyla beytülmâl tarafından el konulan terekesini alması

Vilâyet-i Anadolu’da vâki‘ Eğin kazâsına tâbi‘ Gemürgâp nâm karye sükkânından Onnes v. Emircan nâm Ermeni meclis-i şer‘-i şer[îf]de Havâss-ı aliyye kazâsı muzâfâtından Hasköy’de bi’l-fi‘il subaşı ve beytülmâl emîni olan Mehmed Bey b. ( ) nâm kimesne mahzarında üzerine takrîr-i da‘vâ edip mârrü’z-zikr Hasköy’de sâkin iken bundan akdem mürd olup vârisi olduğum li ebeveyn karındaşım Kavru nâm Ermeni’nin muhallefâtına vaz‘-ı yed eylemişdir suâl olunup yedi kasr olunmak matlûbumdur dedikde, gıbbe’s-suâl emîn-i mezbûr cevâbında müdde‘î-i mersûm mürd-i merkūmun karındaşı olduğunu münkir olıcak müdde‘î-i mezbûrdan da‘vâsına mutâbık beyyine taleb olundukda udûl-i müslimînden olup karye-i mezkûre sükkânından Osman Beşe b. Abdullah ve Mustafa Çelebi b. Abdullah nâm kimesneler li ecli’ş-şehâde meclis-i şer‘a hâzırân olup gıbbe’l-istişhâdi’ş-şer‘î müdde‘î-i mezbûr fi’l-hakīka mürd-i merkūmun li ebeveyn karındaşı ve vârisidir anaları ismi ( ) ve babaları ismi Emircan ve maskat-ı re’sleri [112] karye-i mezbûredir biz bu husûsa şâhidleriz şehâdet dahi ederiz deyû edâ-i şehâdet-i şer‘iyye ettiklerinde ba‘de ri‘âyet-i şerâ’iti’l-kabûl şehâdetleri hayyiz-i kabûlde vâkı‘a olmağın emîn-i mezbûrun muhallefât-ı mezkûreden kasr-ı yedine tenbîh olunup mâ hüve’l-vâki‘ bi’t-taleb ketb olundu. Tahrîren fî evâhiri Muharremi’l-harâm li sene semânin ve erba‘în ve elf.


Şuhûdü’l-hâl: Muzaffer Çavuş b. Abdullah, Mehmed Bey b. Hüseyin, Sefer Bey b. Zülfikar, Hüseyin Beşe b. Abdullah er-Râcil, Mehmed b. Haydar el-Müezzin, Mehmed b. Mehmed el-Müezzin