|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 177 Hüküm no: 197 Orijinal metin no: [112-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Yorgi v. Nikola’nın, ölen babasının bostancı Kemal’in zimmetinde sebze mahsûlünden kalan alacağını tahsil ettiği
Havâss-ı aliyye kazâsına tâbi‘ Hasköy’de sâkin zimmî tâ’ifesinden Yorgi v. Nikola nâm zimmî meclis-i şer‘-i hatîr-i lâzımü’t-tevkīrde işbu râfi‘-i hâze’s-sifr Yahudi tâ’ifesinden Kemal v. Yakob nâm Yahudi mahzarında bi’t-tav‘i’s-sâf ikrâr ve takrîr-i kelâm edip bundan akdem mezbûr Kemal’in karye-i mezkûrede vâki‘ lede’l-ahâlî ve’l-cîrân ma‘lûmü’l-hudûd olan bostanında müste’cir iken mürd olan babam merkūm Nikola’nın bostan-ı mezbûr içinde bâkī kalan sebzevât kıymetinden merkūm Kemal zimmetinde bin beş yüz akçe hakkı kalıp irs-i şer‘î ile bana intikāl etmeğin zikr olunan meblağ-ı mezbûr bin beş yüz akçeyi merkūm Kemal yedinden verâsetim hasebiyle bi’t-tamâm ve’l-kemâl ahz u kabz eyledim, meblağ-ı mezbûr bin beş yüz akçeden bir akçe ve bir habbe hakkım kalmadı dedikde mukırr-ı merkūmun ikrâr-ı meşrûhunu el-mukarru lehü’l-mezbûr Kemal bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâhiri Muharremi’l-harâm sene semânin ve erba‘în ve elf.
Şuhûdü’l-hâl: Hasan b. Abdullah, Ali b. Abdullah, Kirko v. Yani, Mosi v. Mosi ve gayruhüm
|