|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 177 Hüküm no: 198 Orijinal metin no: [112-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Müslüman olan Mustafa b. Abdullah’ın daha önce namzedi olduğu Yakob v. Murad’ın kızından ayrıldığı
Havâss-ı aliyye kazâsına tâbi‘ Hasköy mahallâtından Turşucu mahallesinde sâkin Mustafa b. Abdullah [nâm] mühtedî meclis-i şer‘-i hatîr-i lâzımü’t-tevkīrde Mahmiye-i İstanbul’da Balat Câmi‘i kurbunda vâki‘ Çingene mahallesinde sâkine ( ) Ermeniyye tarafından husûs-ı âti’l-beyânı tasdîke vekîl olup hasm-ı şer‘î-i câhid mahzarında bimâ hüve nehcü’s-sübût şer‘an isbât-ı vekâlet eden bâ‘is-i hâze’l-kitâb Yakob v. Murad nâm Ermeni muvâcehesinde bi’t-tav‘i’s-sâf ikrâr ve i‘tirâf edip bundan akdem mezbûr Yakob’un sulbiye kızı mezbûre ( ) nâm Ermeniyye benim namzedim olup ben şeref-i İslâm ile müşerref oldukda benden tefrîk olunmağın el-hâletü hâzihî mezbûr Yakob’dan ve müvekkilesi olan sulbiyesi mezbûreden husûs-ı mezbûre müte‘allik da‘vâ ve nizâ‘ım yokdur eğer ba‘de’l-yevm benden ve âhardan bizzat ve bi’l-vâsıta husûs-ı mezbûra müte‘allik da‘vâ ve nizâ‘ sudûr ve zuhûr ederse lede’l-hükkâmi’l-kirâm istimâ‘ olunmasın dedikde mukırr-ı mezbûr mühtedî Mustafa’nın minvâl-i meşrûh üzre sudûr eden kelimâtını [113] vekîl-i merkūm Yakob gıbbe’t-tasdîki’ş-şer‘î vicâhen mâ vaka‘a bi’t-taleb ketb olundu. Tahrîren fî evâhiri Muharremi’l-harâm li sene semânin ve erba‘în ve elf.
Şuhûdü’l-hâl: Mahmud Çelebi b. Mehmed es-Serrâc, İbrahim Çelebi b. İsmail, Ali Dede b. Hüseyin, Ali Beşe [b.] Abdullah, Keliki? v. Bayik?, Papas v. Mıgırdiç
|