.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 178
Hüküm no: 199
Orijinal metin no: [113-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hasköy ve Sütlüce’deki mumcuların mum yağı alacakları kasaplar ile mum dağıtımı yapacakları dükkânlar hakkında aralarında yaptıkları anlaşma

Havâss-ı aliyye kazâsı muzâfâtından Hasköy’de vâki‘ mumhânede sâkin olup mumcu tâ’ifesinden olan Rizo v. Apostol ve Hırso v. Rizo nâm zimmîler mahfil-i kazâda yine karye-i mezbûre mahallâtından Sütlüce mahallesinde vâki‘ mumhânede sâkin olup mumcu tâ’ifesinden olan İsteryo v. İstat ve Yani v. Papas nâm zimmîler muvâcehesinde takrîr-i kelâm edip kadîmü’l-eyyâmdan karye-i mezbûrede iki mumcu dükkânı olup biz dükkânımızda mum işlemek için karye-i mezbûre mahallâtından Pîrî Paşa mahallesinde vâki‘ olan kasab dükkânından mum yağı alıp ve işlediğimiz mumu dahi zikr olunan Hasköy’den Turşucu mahallesinde olan dükkânlara varınca tevzî‘ edegelip mezbûr İsteryo ve Yani dahi dükkânlarında mum işlemek için mum yağını mahrûse-i İstanbul ve sâirlerden alagelip lâkin işlediği mumu karye-i mezbûre mahallâtından Abdüsselam mahallesinden Sütlüce mahallesine varıncaya değin vâki‘ olan dükkânlara tevzî‘ edegelmişler idi, el-hâletü hâzihî beynimizde şöyle mu‘âhede eyledik ki zikr olunan Pîrî Paşa mahallesinde olan kasab dükkânlar[ınd]an biz iki hisse mum yağı alıp ve mezbûrân İsteryo ve Yani bir hisse mum yağı alıp ve işlediğimiz mumu zikr olunan Hasköy’den mârrü’z-zikr Turşucu mahallesinde deryâ kenarından kaldırıma varınca vâki‘ olan dükkânlara tevzî‘ edip ve mezbûrân İsteryo ve Yani işledikleri mumu mârrü’z-zikr kaldırımdan zikr olunan Sütlüce mahallesinde sâkin ( ) mumhâneye varınca vâki‘ olan dükkânlara tevzî‘ edeler, ba‘de’l-yevm zikr olunan Hasköy tarafında kasab dükkânı feth olunursa vech-i muharrer üzre biz mum yağı alıp ve zikr olunan Turşucu mahallesinde vâki‘ mârrü’z-zikr kaldırımdan Sütlüce mahallesine varınca feth olunan kasab dükkânlarından mezbûrân İsteryo v. Yani mum yağı almak üzerine mu‘âhede ve ittifâk eyledik dediklerinde gıbbe’t-tasdîk mâ hüve’l-vâki‘ hıfzan li’l-makāl ketb olunup yedlerine bu hurûf def‘ olundu. Tahrîren fî evâhiri Muharremi’l-harâm li sene semânin ve erba‘în ve elf.


Şuhûdü’l-hâl: ( )