.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 181
Hüküm no: 202
Orijinal metin no: [114-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mehmed Bey b. Abdullah’ın evinin yarı hissesini zevcesi Âişe’ye satıp bedelini borcu ile takas ettiği

Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkin Mehmed Bey b. Abdullah nâm kimesne meclis-i şer‘de işbu bâ‘isetü’l-kitâb zevcesi Âişe bt. Abdullah nâm hâtun mahzarında bi’t-tav‘i’s-sâf ikrâr ve takrîr-i kelâm edip mahalle-i mezbûre[de] vâki‘ bir tarafı (...) ve bir tarafı tarîk-i hâs ve bir tarafı ba‘zan Ali Hoca ve ba‘zan Zâhide bt. ( ) Hâtun mülkleri ve bir tarafı tarîk-i âm ile mahdûd ve mümtâz olan iki bâb fevkānî ocaklı odanın ve bir sofanın ve iki bâb tahtânî odanın ve bir ahırın ve bir kenîfin ve bir su kuyusunun ve hudûd-ı mezkûr dâhilinde vâki‘ tahmînen bir dönüm bağı muhtevî olan mülk menzilimin nısf hisse-i şâyi‘amı zevce-i mezbûre Âişe’ye on beş bin akçeye bey‘-i bâtt-ı sahîh-i şer‘î ile bey‘ edip teslîm-i mebî‘-i mahdûd eylediğimden sonra semen olan meblağ-ı mezbûru müşterî-i mezkûrenin benim zimmetimde olan cihet-i karz-ı şer‘îden on beş bin akçe hakkına takas eyledim ba‘de’l-yevm zikr olunan menzilin nısf-ı şâyi‘i mezbûre Âişe’nin mülk-i müşterâsıdır keyfe mâ teşâ ve tahtâr mutasarrıfa olsun dedikde mukırr-ı merkūmun ikrâr-ı meşrûhunu el-mukarru leha’l-mezbûre bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâmin aşer min Saferi’l-hayr li sene semânin ve erba‘în ve elf.


Şuhûdü’l-hâl: Mahmud Çelebi b. Mustafa el-İmâm, Mahmud Çelebi b. Mehmed es-Serrâc, Mehmed Halîfe b. Abdülkerim el-Müezzin, Mehmed Halîfe b. İbrahim el-Müezzin, Ali Çelebi [b.] Abdullah, Kadri Çelebi b. Hasan, Abdi Bey b. Şaban es-Serrâc, Kara Mustafa (...) peremeci