.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 182
Hüküm no: 203
Orijinal metin no: [114-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mehmed b. Abdullah’ın terekesinden beytülmâle intikal eden menzil hisselerinin müzâyede ile zevcesi Âişe Hâtun’a satıldığı

Mahmiye-i İstanbul’da hâlen gümrük ve beytülmâl emîni olan kıdvetü’l-emâcid ve’l-ekârim Ali Ağa b. Abdullah nâm [kimesne] tarafından husûs-ı âti’l-beyânı ikrâra vekîl olup şer‘an vekâleti sâbite olan fahrü’l-akrân İsmail Çelebi b. el-Hâc Yusuf mahfil-i kazâda Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkine olan işbu bâ‘isetü’l-kitâb Âişe bt. Abdullah nâm hâtun mahzarında bi’l-vekâle ikrâr ve takrîr-i kelâm edip mahalle-i mezbûrede sâkin iken fevt olup zâhirde zevce-i metrûkesi mezbûre Âişe Hâtun’dan gayrı vâris-i ma‘rûfu olmamağın metrûkâtının selâse erbâ‘ı cânib-i beytülmâle âid olan Mehmed b. Abdullah nâm müteveffânın muhallefâtından mahalle-i mezbûrede vâki‘ bir tarafı İbrahim Paşa mülkü ve bir tarafı tarîk-i hâs ve bir tarafı Ali Hoca ve Zâhide bt. ( ) hâtun mülkleri ve bir tarafı tarîk-i âm ile mahdûd ve mümtâz olan iki bâb ocaklı odanın ve bir sofanın ve iki bâb tahtânî odanın ve bir ahırın ve bir kenîfin ve bir su kuyusunun ve hudûd-ı mezkûre dâhilinde vâki‘ tahmînen bir dönüm bağı muhtevî olan menzilin nısf-ı şâyi‘i mezbûre Âişe’nin mülk-i müşterâsı olup selâse erbâ‘ı beytülmâle âid olmağın mecâlis-i tâlibînde müzâyede olundukda yirmi beş bin akçede mezbûre Âişe üzerinde karâr edip bir akçe ziyâde ile tâlib-i âhar olmamağın menzil-i mezbûrun selâse erbâ‘ı şâyi‘ini mezbûre Âişe’ye meblağ-ı merkūm yirmi beş bin akçeye vekâletim [ve] emânetim hasebiyle bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim keyfe mâ teşâ mutasarrıfa olsun dedikde vekîl-i müşârun-ileyhi kelimât-ı meşrûhasında mezbûre Âişe bi’l-muvâcehe tasdîk edicek mâ hüve’l-vâki‘ [bi’t-taleb ketb olundu.] Tahrîren fi’l-yevmi’s-sâlis ve’l-ışrîn min Safer sene semânin ve erba‘în ve elf.


Şuhûdü’l-hâl: Mahmud Çelebi b. Mehmed çorbacı?, Mehmed Çelebi b. Mustafa el-İmâm, Mehmed Halîfe b. İbrahim el-Müezzin, Mehmed Çelebi b. Abdülkerim el-Müezzin, Ali Çelebi b. Abdullah, Kadri Çelebi b. Hasan, Mustafa Beşe ...?, Ahmed Çelebi [b.] Muslu, Musa b. Mehmed, es-Seyyid Mehmed b. es-Seyyid Hüseyin, Ali b. Abdullah ve gayruhüm