|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 182 Hüküm no: 204 Orijinal metin no: [115-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Âişe bt. Abdullah’ın ölen kocasının zimmetinde kalan mehir alacağının terekesinin beytülmâle intikal eden kısmından ödenmesine hükmedildiği
Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkin iken fevt olan Mehmed Bey b. Abdullah’ın zevce-i metrûkesi ve vârisesi olan Âişe bt. Abdullah nâm hâtun mahfil-i kazâda müteveffâ-yı mezbûrun muhallefâtının selâse erbâ‘ı beytülmâle âid olmağın Mahmiye-i İstanbul’da hâlen gümrük ve beytülmâl emîni olan kıdvetü’l-emâcid ve’l-ekârim Ali Ağa b. Abdullah tarafından muhallefât-ı mezbûrenin selâse erbâ‘ı da‘vâya vekîl olup şer‘an vekâleti sâbite olan fahrü’l-akrân İsmail Çelebi b. el-Hâc Yusuf mahzarında takrîr-i da‘vâ edip müteveffâ-yı mezbûr zimmetinde ma‘kūdun aleyh olan mehr-i müeccelinden on bin akçe hakkım olup müteveffâ-yı mezbûr hâl-i sıhhatinde ve huzûr-ı müslimînde on bin akçe mehr-i müeccel üzerine akd eylemişdir suâl olunup muhallefâtının selâse erbâ‘ından alıverilmek matlûbumdur dedikde, gıbbe’s-suâl ve akībe’l-inkâr mezbûre Âişe’nin sıdk-ı makāline mutâbık beyyine taleb olundukda udûl-i müslimînden olup mahalle-i mezbûre sâkinlerinden Mehmed Çelebi b. Mustafa el-İmâm ve Mehmed Halîfe b. İbrahim el-Müezzin li ecli’ş-şehâde meclis-i şer‘a hâzırân olup gıbbe’l-istişhâdi’ş-şer‘î fi’l-hakīka müteveffâ-yı mezbûr Mehmed Bey hâl-i sıhhatinde bizim huzûrumuzda on bin akçe mehr-i müeccel üzerine akd eyledi biz bu husûsa şâhidleriz şehâdet dahi ederiz deyû edâ-i şehâdet-i şer‘iyye ettiklerinde, ba‘de ri‘âyeti şerâ’iti’l-kabûl ve şehâdetleri hayyiz-i kabûlde vâkı‘a oldukdan sonra mezbûre Âişe meblağ-ı mezbûru zevci müteveffâ-yı mezbûrdan hâl-i sıhhatinde küllen ve ba‘zan ahz u kabz ve hibe eylemeyip vücûh-ı şer‘iyyeden bir vechile zimmetini ibrâ eylemediğine yemîn teklîf olundukda ol dahi ale’l-vechi’l-mes’ûl half billâhi’l-azîm edicek meblağ-ı mezbûru muhallefât-ı mezkûreden mezbûre Âişe’ye edâya tenbîh birle mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâlis ve’l-ışrîn min Saferi’l-hayr li sene semânin ve erba‘în ve elf.
Şuhûdü’l-hâl: ( )
|