.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 183
Hüküm no: 205
Orijinal metin no: [115-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mehmed Bey’in muhallefâtından beytülmâle ait olan kısmının beytülmâl emîni Ali Ağa tarafından zevcesi Âişe Hâtun’dan tahsil edildiği

Mahmiye-i İstanbul’da hâlen gümrük emîni ve beytülmâl emîni olan kıdvetü’l-emâcid ve’l-ekârim Ali Ağa b. [Abdullah] tarafından husûs-ı âti’l-beyânı ikrâr ve kabza vekîl olup şer‘an vekâleti sâbite olan fahrü’l-akrân İsmail Çelebi b. el-Hâc Yusuf mahfil-i kazâda Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkin iken fevt [olup] zâhirde zevce-i metrûkesi Âişe bt. Abdullah nâm hâtundan gayrı vâris-i ma‘rûfu olmamağın metrûkâtının selâse-i erbâ‘ı beytülmâle âid olan Mehmed Bey b. Abdullah nâm müteveffânın muhallefâtının selâse-i erbâ‘ına vâzı‘atü’l-yed olan mezbûre Âişe Hâtun mahzarında bi’l-vekâle ikrâr ve takrîr-i kelâm edip müteveffâ-yı mezbûrun cümle muhallefâtının kıymeti ve nukūdu elli yedi bin akçe edip meblağ-ı mezbûr elli yedi bin akçenin selâse-i erbâ‘ını vekâletim ve emânetim hasebiyle bi’t-tamâm ahz u kabz edip mezbûre Âişe yedinde beytülmâle âid olan muhallefât-ı merkūmeden mâl ıtlâk olunur şey kalmayıp min ba‘d husûs-ı mezbûre müte‘allik cemî‘ de‘âvî ve mutâlebât ve husûmât ve eymândan vekâletim hasebiyle mezbûre Âişe’nin zimmetini ibrâ ve ıskāt ile ıskāt eyledim dedikde vekîl-i merkūmun kelimât-ı meşrûhasında el-mukarru leha’l-mezbûre Âişe bi’l-muvâcehe tasdîk ve bi’l-mü[şâfehe] tahkīk [edicek] mâ [-hüve’l-vâki‘ bi’t-taleb ketb] olundu. Tahrîren fi’l-yevmi’s-sâlis ve’l-ışrîn min Saferi’l-hayr li sene semânin ve erba‘în ve elf.


Şuhûdü’l-hâl: Mahmud Çelebi b. Mehmed es-Serrâc, Mehmed Çelebi [b.] Mustafa el-İmâm, Ahmed b. Muslu hammâmî, Mehmed Halîfe b. İbrahim el-Müezzin, Mustafa Beşe [b.] Nurullah, Mehmed b. Mustafa bevvâb-ı sultânî, Musa b. Ömer, es-Seyyid Mehmed b. es-Seyyid Hüseyin, Mehmed b. Rıdvan, Ali b. Abdullah