|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 184 Hüküm no: 206 Orijinal metin no: [115-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ahmed Çavuş b. Hamza’nın vefat eden Hüseyin Bey’de kalan alacağını vârislerinden talep ettiği, inkârları üzerine sulh oldukları
Mahmiye-i İstanbul’da Sultan Selim Câmi‘i kurbunda vâki‘ Kovacılar mahallesinde sâkin Ahmed Çavuş b. Hamza nâm kimesne mahfil-i kazâda Havâss-ı aliyye kazâsına tâbi‘ Hasköy mahallâtından Turşucu mahallesinde sâkin iken bundan akdem fevt olan Hüseyin Bey b. Mehmed nâm müteveffânın zevce-i metrûkesi Kamer bt. Abdullah ve kebîre kızı İsmihânî ve vâlidesi Münteha bt. Abdullah ve sagīr oğlu Hasan’ın tesviye-i umûruna vasîyy-i muhtârı olan Muslu Çelebi b. Veli mahzarlarında ikrâr ve takrîr-i kelâm edip müteveffâ-yı mezbûrun zimmetinde elli yedi bin akçe hakkım olup meblağ-ı mezbûrun yirmi bin akçesin müteveffâ-yı mezbûr hayâtda iken yedinden ahz u kabz edip otuz yedi bin akçe hakkım zimmetinde kalıp müteveffâ-yı mezbûrun muhallefâtı mezbûrlara intikāl eylemeğin mezbûrlardan asâleten ve vesâyeten da‘vâ ve taleb edip suâl olundukda müdde‘î-i mezkûr inkâr ile cevâb verdiklerinde beynimizde münâza‘ât-ı kesîre ve muhâsamât-ı şedîde vâkı‘a oldukda muslihûn tavassut edip mâbeynimizi on bin akçe üzerine inkârdan sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr on bin akçeyi asâleten ve vesâyeten yedlerinden bi’t-tamâm ahz u kabz edip min ba‘d husûs-ı mezbûra müte‘allik da‘vâ ve husûmât ve eymân ve muhâsamâtdan mezbûrların zimmetlerini ibrâ ve kātı‘ü’n-nizâ‘la ibrâ ve ıskāt eyledim deyû bi’t-tav‘ ve’r-rızâ ikrâr ve i‘tirâf ettiğinde el-mukarru lehümü’l-mezbûrûn dahi bi’l-muvâcehe tasdîk ve bi’l-müşâfehe tasdîk edicek mâ hüve’l-vâki‘ [bi’t-taleb] ketb olundu. Tahrîren fî evâhiri Saferi’l-hayr sene semânin ve erba‘în ve elf.
Şuhûdü’l-hâl: İbrahim Efendi b. Bâli el-Hatîb, Ebûbekir Çelebi b. Mehmed, Mehmed Bey b. Mustafa bevvâb, Mehmed b. Mehmed el-Müezzin, İsa b. Musa, Ali b. Abdullah
|