|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 185 Hüküm no: 207 Orijinal metin no: [116-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Rizo v. Apostol ve Harto v. Rizo’nun aldıkları borç karşılığı mumhânelerini yeniçeri odalarından otuz altıncı odanın vakfına istiğlâl yoluyla sattıkları
Havâss-ı aliyye kazâsına tâbi‘ Hasköy’de sâkin mumcu tâ’ifesinden Rizo v. Apostol ve Harto v. Rizo nâm zimmîler meclis-i şer‘-i hatîr-i lâzımü’t-tevkīrde Dergâh-ı âlî yeniçerileri odalarından otuz altıncı ağa bölüğünde olan odanın vakıf akçesine bi’l-fi‘il nâzır olup sâbıkan çorbacı olan Ali Subaşı mahzarında her biri ikrâr ve takrîr-i kelâm edip karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd olan mumhânemizi mezbûr Ali Subaşı’ya on üç bin akçeye bey‘ edip nâzır-ı mezbûr Ali Subaşı dahi mâl-ı vakıf ile bi-tarîki’l-istiğlâl iştirâ edip kabz-ı semen-i ma‘dûd ve teslîm-i mebî‘-i mahdûd eylediğimizden sonra oda-i mezbûrede sâkin olan cümle ihtiyârlar izniyle zikr olunan mumhâneyi ba‘de’t-tahliyeti’ş-şer‘iyye yine târih-i kitâb şehri gurresinden yedi ay tamâmına varınca nâzır-ı mezbûr Ali Subaşı’dan bin beş yüz altmış akçeye istîcâr eyledik ol dahi vech-i meşrûh üzre îcâr ve teslîm eyledikde gıbbe’t-tasdîki’l-vicâhî mâ hüve’l-vâki‘ bi’t-taleb ketb olundu. Tahrîren fî evâili Rebî‘ilevvel li sene semânin ve erba‘în ve elf.
Şuhûdü’l-hâl: İlyas Beşe b. Abdullah er-Râcil, İlyas Beşe b. Abdullah er-Râcil, Veli Beşe b. Süleyman er-Râcil, Mustafa Beşe b. Abdullah er-Râcil, Hüseyin Çelebi b. Abdullah ...?
|