.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 185
Hüküm no: 208
Orijinal metin no: [116-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Himmet b. Pürkadem’in evini Serkis v. Onnes’e sattığı

Havâss-ı aliyye kazâsına tâbi‘ Hasköy mahallâtından el-Hâc Şaban mahallesinde sâkin Himmet b. Pürkadem nâm kimesne meclis-i şer‘-i hatîr-i lâzımü’t-tevkīrde işbu râfi‘-i hâze’s-sifr Serkis v. Onnes nâm Ermeni mahzarında bi’t-tav‘i’s-sâf ikrâr ve takrîr-i kelâm edip silk-i mülkümde münselik olup karye-i mezbûre mahallâtından Pîrî Paşa mahallesinde vâki‘ bir tarafı İlyas b. Mehmed mülkü bir tarafı Abdülbâkī mülkü ve bir tarafı Latef v. ( ) mülkü ve bir tarafı tarîk-i hâs ile mahdûd ve mümtâz olup iki bâb fevkānî odayı ve bir bâb ahırı ve bir bi’r-i mâ’ı ve havluyu müştemil olan mülk menzilimi mezbûr Serkis’e nakd-i râyic fi’l-vakt on iki bin beş yüz akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim, ba‘de’l-yevm zikr olunan menzil mezbûr Serkis’in mülk-i müşterâsıdır keyfemâ yeşâ ve yehtâr mutasarrıf olsun dedikde, mukırr-ı merkūmun ikrâr-ı meşrûhunu el-mukarru lehü’l-mezbûr Serkis bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Rebî‘ilevvel li sene semânin ve erba‘în ve elf.


Şuhûdü’l-hâl: Mehmed Beşe b. Abdullah, Fazlullah b. Mehmed, Ahmed Çelebi b. Muslu, Abdünnebi b. Musa, Hüseyin Çavuş kasab, Mehmed b. Sefer, Ebûbekir b. Mustafa, Hasan Beşe b. Oruc?, Mustafa b. Abdullah, Mehmed b. Bilal, İlyas b. Mehmed ve gayruhüm