.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 186
Hüküm no: 209
Orijinal metin no: [116-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Vefat eden Hüseyin Bey b. Mehmed’in evinin borcu ve küçük oğlunun nafakası için Mehmed Bey b. Mustafa’ya satıldığı

Havâss-ı aliyye kazâsına tâbi‘ Hasköy mahallâtından Turşucu mahallesinde sâkin iken fevt olan Hüseyin Bey b. Mehmed nâm kimesnenin verâseti sulbî sagīr oğlu Hasan’a ve sadriye kebîre kızı Ümmühânî’ye ve vâlidesi Münteha bt. Abdullah nâm hâtuna münhasıra olduğu şer‘an mütehakkik oldukdan sonra mezbûre Ümmühânî’nin vekîl-i şer‘îsi olan zevci İsmail Çelebi b. ( ) nâm kimesne vekâleten ve mezbûre Münteha asâleten ve sagīr-i mezbûrun tesviye-i umûruna vasîyy-i muhtârı olan Muslu b. Veli nâm kimesne vesâyeten mahfil-i kazâda işbu râfi‘-i hâze’l-kitâb Mehmed Bey b. Mustafa nâm bevvâb-ı sultânî mahzarında her biri ikrâr ve takrîr-i kelâm edip merhûm-ı mezbûr medyûnen vefât edip nukūd ve menkūlünden mahalle-i mezbûrede vâki‘ bir tarafı Ebûbekir Çelebi b. Mehmed ve ba‘zan Durmuş Bey b. Salih mülkleri ve bir tarafı [117] tarîk-i âm ve bir tarafı müşterî[-i] merkūm mülkü ve bir tarafı zâviye ve ba‘zan tarîk-i âm ile mahdûd ve mümtâz olup dört bâb fevkānî ocaklı odayı ve bir bâb ahırı ve bir bâb matbahı ve bir şehnişîni ve iki bi’r-i mâ’ı ve hadîka-i zât-ı eşcâr-ı müsmire ve gayr-ı müsmireyi ve hudûd-ı mezkûre dâhilinde vâki‘ tahmînen üç dönüm bağı muhtevî olan mülk menzilinden gayrı deynine vefâ eder mâlı olmayıp cihet-i karz-ı şer‘îden Ahmed Çavuş b. Hamza nâm kimesneye olan on bin akçe deyn-i müsbeti ve sagīr-i mezbûrun zarûret-i nafakası için menzil-i mezbûrun bey‘i lâzım gelmeğin cânib-i şer‘-i kavîmden bey‘ine izin ve icâzet verildikden sonra menzil-i mezbûr sûk-ı sultânî’de kirâren ve mirâren müzâyede olunup rağabât-ı nâs bi’l-külliye munkatı‘a oldukdan sonra menzil-i mezbûr merkūm Mehmed Bey üzerinde elli iki bin nakd-i râyic fi’l-vakt akçede karâr edip ve ziyâde ile tâlib-i âhar dahi zuhûr etmemeğin menzil-i mezbûru asâleten ve vekâleten ve vesâyeten merkūm Mehmed Bey’e müteveffâ-yı mezbûrun zarûret-i deyni ve sagīr-i mezbûrun zarûret-i nafakası için merkūmü’l-mikdâr elli iki bin akçeye bey‘-i kat‘î ile bey‘ edip ol dahi vech-i muharrer üzre iştirâ eyledikden sonra kabz-ı semen-i ma‘dûd ve teslîm-i mebî‘-i mahdûd eyledik dediklerinde mukırrûn-ı mezbûrûnun asâleten ve vekâleten ve vesâyeten vech-i muharrer üzre cârî olan ikrârlarını el-mukarru lehü’l-mezbûr Mehmed Bey bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Rebî‘ilevvel li sene semânin ve erba‘în ve elf.


Şuhûdü’l-hâl: ( )