|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 187 Hüküm no: 210 Orijinal metin no: [117-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Vefat eden Hüseyin b. Mehmed’in mülk bağının borcu ve küçük oğlunun nafakası için müzâyede ile Mehmed Bey b. Mustafa’ya satıldığı
Havâss-ı aliyye kazâsına tâbi‘ Hasköy mahallâtından Turşucu mahallesinde sâkin iken fevt olan Hüseyin Bey b. Mehmed nâm kimesne[nin] verâseti sulbî sagīr oğlu Hasan’a ve sadriye kebîre kızı Ümmühânî’ye ve vâlidesi Münteha bt. Abdullah nâm hâtuna münhasıra olduğu şer‘an mütehakkik oldukdan sonra mezbûre Ümmühânî’nin vekîl-i şer‘îsi olan zevci İsmail Çelebi b. ( ) nâm kimesne vekâleten ve mezbûre Münteha asâleten ve sagīr-i mezbûrun tesviye-i umûruna vasîyy-i muhtârı olan Muslu Çelebi b. Veli nâm kimesne mahfil-i kazâda işbu râfi‘-i hâze’l-kitâb Mehmed Bey b. Mustafa nâm bevvâb-ı sultânî mahzarında her biri ikrâr ve takrîr-i kelâm edip merhûm-ı mezbûr medyûnen vefât edip nukūd ve menkūlünden karye-i mezbûre mahallâtından Abdüsselam mahallesinde vâki‘ bir tarafı Yusuf Efendi bağı ve bir tarafı Âişe bt. Hasan nâm hâtun bağı ve bir tarafı Dimitri v. Kosta bağı ve bir tarafı tarîk-i [118] âm ile mahdûd ve mümtâz olup iki bâb tahtânî odayı ve iki bi’r-i mâ’ı ve hadîka-i zât-ı eşcâr-ı müsmire ve gayr-ı müsmireyi müştemil olan mülk bir kıt‘a bağından gayrı deynine vefâ eder mâlı olmayıp cihet-i karz-ı şer‘îden Ahmed Çavuş b. Hamza nâm kimesneye olan on bin akçe deyn-i müsbeti ve sagīr-i mezbûrun zarûret-i nafakası için bağ-ı mezbûrun bey‘i lâzım gelmeğin cânib-i şer‘-i kavîmden bey‘ine izin ve icâzet verildikden sonra bağ-ı mezbûr sûk-ı sultânî’de kirâren ve mirâren müzâyede olunup rağabât[-ı nâs] bi’l-külliye munkatı‘a oldukdan sonra bağ-ı mezbûr merkūm Mehmed Bey üzerinde otuz bin nakd-i râyic fi’l-vakt akçede karâr edip ve ziyâde ile tâlib-i âhar dahi zuhûr etmemeğin bağ-ı mezbûru asâleten ve vekâleten ve vesâyeten merkūm Mehmed Bey’e müteveffâ-yı mezbûrun zarûret-i deyni ve sagīr-i mezbûrun zarûret-i nafakası için merkūmü’l-mikdâr otuz bin akçeye bey‘-i kat‘î ile bey‘ edip ol dahi vech-i muharrer üzre iştirâ eyledikden sonra kabz-ı semen-i ma‘dûd ve teslîm-i mebî‘-i mahdûd eylediğimizde mukırrûn-ı mezbûrûnun asâleten ve vekâleten ve vesâyeten vech-i meşrûh üzre cârî olan ikrârlarını mezbûr Mehmed Bey bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Rebî‘ilevvel sene 1048.
Şuhûdü’l-hâl: İbrahim Efendi b. Hüsrev el-İmâm, Ahmed Efendi b. Abdi el-İmâm, Mehmed Efendi b. Mustafa el-İmâm, Ahmed Bey b. Şükrullah el-Cündî, Mahmud Çelebi b. Mehmed es-Serrâc, Mahmud Bey b. Mirza el-Cündî, Mehmed Halîfe b. Haydar el-Müezzin, Mehmed b. Kasım el-Müezzin, Mehmed b. Mehmed el-Müezzin, Ahmed Çelebi b. Muslu, Ebûbekir Çelebi b. Mehmed, Abdünnebi b. Musa, Mehmed Halîfe b. İbrahim el-Müezzin, Ömer b. Mustafa, Hüseyin b. Abdullah, Ali b. Abdullah, Mustafa b. Ahmed münâdî, Derviş Bey münâdî ve gayruhüm
|