|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 188 Hüküm no: 212 Orijinal metin no: [119-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed Bey’in aldığı borca karşılık mülk evini ve bağlarını Hüseyin Bey’in yetimlerinin vasîsine istiğlâlen sattığı
Havâss-ı aliyye kazâsına tâbi‘ Hasköy mahallâtından Turşucu mahallesinde sâkin Mehmed Bey b. Mustafa nâm bevvâb-ı sultânî meclis-i şer‘-i hatîr-i lâzımü’t-tevkīrde yine mahalle-i mezbûrede sâkin iken vefât eden Hüseyin Bey b. Mehmed nâm müteveffânın sulbî oğlu Hasan’ın tesviye-i umûruna vasîyy-i muhtârı olan Muslu Çelebi b. Veli nâm kimesne mahzarında ikrâr ve takrîr-i kelâm edip karye-i mezbûre mahallâtından Turşucu mahallesinde vâki‘ lede’l-ahâlî ve’l-cîrân ma‘lûmü’l-hudûd olan dört bâb fevkānî odayı ve bir matbahı ve bir bâb ahırı müştemil olan mülk menzilimi ve hudûd-ı mezkûrun dâhilinde vâki‘ tahmînen üç dönüm bağımı ve yine karye-i mezbûre mahallâtından Abdüsselam mahallesinde vâki‘ lede’l-ahâlî ve’l-cîrân ma‘lûmü’l-hudûd olan bir kıt‘a mülk bağımı safka-i vâhide ile vasîyy-i mezbûr Muslu Çelebi’ye kırk bin akçeye bey‘ edip vasîyy-i mezbûr Muslu Çelebi dahi mâl-ı yetîm ile bi-tarîki’l-istiğlâl iştirâ edip kabz-ı semen-i ma‘dûd ve teslîm-i mebî‘-i mahdûd eylediğimden sonra zikr olunan menzili ve bir kıt‘a bağı ba‘de’t-tahliyeti’ş-şer‘iyye târih-i kitâb şehri gurresinden sene tamâmına varınca vasîyy-i mezbûr Muslu Çelebi’den dört bin akçeye istîcâr eyledim ol dahi vech-i mübeyyen üzre îcâr ve teslîm eyledikde gıbbe’t-tasdîki’l-vicâhî mâ hüve’l-vâki‘ bi’t-taleb ketb olundu. Tahrîren fi’l-yevmi’l-âşir min Rebî‘ilevvel li sene semânin ve erba‘în ve elf.
Şuhûdü’l-hâl: İbrahim Efendi b. Hüsrev el-İmâm, Mehmed Halîfe b. Haydar el-Müezzin, Mehmed b. Kasım el-Müezzin, Mehmed b. Mehmed el-Müezzin
|