.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 190
Hüküm no: 215
Orijinal metin no: [120-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ahmed b. Ali’nin evini Ahmed Beşe b. Ali’ye sattığı

Havâss-ı aliyye kazâsına tâbi‘ Kağıthâne nâm karye sükkânından Ahmed b. Ali nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb Ahmed Beşe b. Ali nâm korucu muvâcehesinde bi’t-tav‘i’s-sâf ikrâr ve takrîr-i kelâm edip karye-i mezbûrede vâki‘ bir tarafı bâyi‘-i mezbûr mülkü ve bir tarafı İmâm Vakfı’na ve iki tarafı tarîk-i âm ile mahdûd ve mümtâz olan bir bâb fevkānî odayı ve bir bâb ahırı ve bir müşterek kenîf çukurunu ve havluyu müştemil olan mülk menzilimi merkūm Ahmed Beşe’ye nakd-i râyic fi’l-vakt dört bin akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm zikr olunan [menzil] merkūm Ahmed Beşe’nin mülk-i müşterâsıdır keyfemâ yeşâ ve yehtâr mutasarrıf olsun dedikde mukırr-ı merkūmun ikrâr-ı meşrûhunu el-mukarru lehü’l-merkūm Ahmed Beşe bi’l-muvâcehe tasdîk edicek [mâ hüve’l-vâki‘ bi’t-taleb ketb olundu.] Tahrîren fi’l-yevmi’l-hâmis ve’l-ışrîn min Rebî‘ilevvel sene semânin ve erba‘în ve elf.


Şuhûdü’l-hâl: Yusuf Efendi [b.] Behram el-Hatîb, İbrahim Bey [b.] Mustafa serrâc, Receb Çelebi b. Ali serrâc, Ebûbekir Halîfe b. Receb el-İmâm, Mehmed Çelebi [b.] Ömer, Süleyman Çelebi [b.] Ali el-Müezzin