|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 190 Hüküm no: 216 Orijinal metin no: [121-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hastalığı nedeniyle çalışamayan Dimo v. Kosta’nın birlikte kiremitçilik yaptıkları ortaklarından hakkını alarak ayrıldığı
Vilâyet-i Rumeli’nde Vize sancağında vâki‘ Hasköy kazâsına tâbi‘ Eski Poloz nâm karyede sâkin Dimo v. Kosta nâm zimmî meclis-i şer‘-i hatîr-i lâzımü’t-tevkīrde işbu râfi‘ay hâze’s-sifr Dimitri v. Pelmeno ve Yani v. Nikola nâm zimmîler mahzarında bi’t-tav‘i’s-sâf ikrâr ve takrîr-i kelâm edip bundan akdem mezbûr zimmîler ile Mahmiye-i Üsküdar kazâsına tâbi‘ Samandıra nâm karyede kiremit işlemek san‘atında şerîk olup bi-iznillâhi te‘âlâ hasta olup hizmete kudretim olmamağın müfârekat ettiğimizde ba‘de küll-i hesâb hisseme bin akçe isâbet edip meblağ-ı mezbûr bin akçeyi mezbûr zimmîler yedinden bi’t-tamâm ve’l-kemâl ahz u kabz eyledim zimmetlerinde bir akçe ve bir habbe hakkım kalmadı dedikde mukırr-ı merkūmun ikrâr-ı meşrûhunu el-mukarru lehü’l-mezbûr zimmîler bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Rebî‘ılâhire li sene semânin ve erba‘în ve elf.
Şuhûdü’l-hâl: Ali b. Abdullah, Kiryona? v. Kostantin, Dimitri v. Todori, Vasil v. Nikola
|