|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 193 Hüküm no: 221 Orijinal metin no: [123-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Harib v. Asuzader?’in evini Mustafa Çavuş’un yetimi Âişe’nin vasîsine yetim malı ile sattığı (bey‘ bi’l-istiğlâl)
Havâss-ı aliyye kazâsı muzâfâtından Hasköy mahallâtından Abdüsselam mahallesinde sâkin Harib v. Asuzader? nâm Ermeni mahfil-i kazâda Mahmiye-i İstanbul mahallâtından Âşık Paşa mahallesinde sâkin iken bundan akdem vefât eden Mustafa Çavuş b. Mahmud nâm müteveffânın sadriye sagīre kızı Âişe’nin tesviye-i umûruna vasîyy-i şer‘îsi olan fahrü’l-akrân Cemşid Çavuş b. Abdülmennân mahzarında ikrâr ve takrîr-i kelâm edip karye-i mezbûre mahallâtından zikr olunan Abdüsselam mahallesinde vâki‘ bir tarafdan Medîne-i Münevvere Vakfı’na ve bir tarafdan Safiye Hâtun Vakfı’na ve iki tarafdan tarîk-i âm ile mahdûd ve mümtâz üç bâb fevkānî beyti ve üç fevkānî sofayı ve dört bâb tahtânî beyti ve bir bâb ahırı müştemil olan mülk menzilimi cümle tevâbi‘ ve levâhıkı ile mûmâ-ileyh Cemşid Çavuş’a elli aded sikke-i haseneye bey‘ edip ol dahi mâl-ı yetîme ile bi-tarîki’l-istiğlâl iştirâ edip kabz-ı semen-i ma‘dûd ve teslîm-i mebî‘-i mahdûd eylediğimden sonra zikr olunan menzili ba‘de’t-tahliyeti’ş-şer‘iyye târih-i kitâbdan yedi ay tamâmına varınca vasîyy-i mezbûr Cemşid Çavuş’dan dokuz yüz akçeye istîcâr eyledim ol dahi vech-i mübeyyen üzre îcâr ve teslîm eyledikden sonra yine karye-i mezbûre sükkânından [124] Arzhan v. Gaza? ve Mercan v. Safer? nâm Ermeniler menzil-i mezbûrun derkine emr-i kabûlü hâviye kefâletle kefîl olduklarında gıbbe’t-tasdîki’l-vicâhî mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâmin aşer min Cumâdelûlâ li sene semânin ve erba‘în ve elf.
Şuhûdü’l-hâl: Mustafa Efendi b. Sinan el-İmâm, Mehmed Çelebi b. Mustafa el-İmâm, Mehmed b. İbrahim el-Müezzin, Receb Beşe b. Yusuf er-Râcil, Ahmed b. Ali el-Kayyım, Mehmed Beşe [b.] İbrahim, Satılmış b. Ramazan, Ali b. Abdullah ve gayruhüm
|