.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 193
Hüküm no: 222
Orijinal metin no: [124-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Şeban v. David’in evini satışı

Havâss-ı aliyye kazâsına tâbi‘ Hasköy mahallâtından el-Hâc Şaban mahallesinde sâkin Yahudi tâ’ifesinden Şeban v. David nâm Yahudi meclis-i şer‘-i hatîr-i lâzımü’t-tevkīrde Haron v. Ahil ve Salamon v. Mosi ve Hayem v. Salamon nâm Yahudiler mahzarlarında bi’t-tav‘i’s-sâf ikrâr ve takrîr-i kelâm edip mahalle-i mezbûrede vâki‘ bir tarafı Kalef v. Baroh mülkü ve bir tarafı Avraham v. Hayem mülkü ve bir tarafı Âişe bt. Abdullah nâm hâtun mülkü ve bir tarafı tarîk-i âm ile mahdûd ve mümtâz olan bir bâb fevkānî odayı ve bir bâb tahtânî odayı ve bir su kuyusunu ve hadîkayı müştemil olan mülk menzilimi mezbûrûn Haron ve Salamon ve Hayem nâm Yahudilere otuz bin nakd-i râyic fi’l-vakt akçeye bey‘i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm zikr olunan menzil mezbûrûn Yahudilerinin mülk-i müşterâlarıdır keyfemâ yeşâ’ûn ve yehtârûn mutasarrıf olsunlar dedikde mukırr-ı merkūmun ikrâr-ı meşrûhunu el-mukarru lehümü’l-mezbûrûn Yahudiler bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâmis ve’l-ışrîn min Cumâdelûlâ li sene semânin ve erba‘în ve elf.


Şuhûdü’l-hâl: Mahmud Çelebi b. Mehmed es-Serrâc, Hasan b. Mehmed er-Râcil, el-Hâc Behmen b. Abdullah, Ahmed Bey b. Mehmed serbölük, Sefer Bey b. Zülfikar, Ali Beşe b. Abdullah, İbrahim b. Ali, Mehmed Kabasakal, Avraham v. Celekeci, Haron v. İsrâyil ve gayruhüm