|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 194 Hüküm no: 223 Orijinal metin no: [125-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Muzaffer Çavuş’un Ahmed ve Ebûbekir’e muhtelif kiremit ve tuğla sattığı ve bedelini tahsil ettiği
Havâss-ı aliyye kazâsına tâbi‘ Hasköy mahallâtından Sütlüce mahallesi kurbunda vâki‘ Kağıthâne Deresi demekle ma‘rûf mevzi‘de vâki‘ kiremit fırınında kiremitçi olan Muzaffer Çavuş b. Abdullah nâm kimesne meclis-i şer‘-i hatîr-i lâzımü’t-tevkīrde işbu râfi‘ay hâze’l-kitâb Ahmed b. Ali ve Ebûbekir b. Hasan nâm kimesneler mahzarında bi’t-tav‘i’s-sâf ikrâr ve takrîr-i kelâm edip fırın-ı mezbûrede olan yirmi dört bin aded nâ-puhte kiremidimi ve bin iki yüz aded beylik çarşı nâ-puhte tuğlamı ve dört bin aded nâ-puhte topaç tuğlamı ve beş bin aded beylik nîme nâ-puhte tuğlamı ve iki bin aded harc-ı çarşı nâ-puhte tuğlamı ve on bin aded harc-ı nîme nâ-puhte tuğlamı mezbûrân Ahmed ve Ebûbekir’e nakd-i râyic fi’l-vakt sekiz bin akçeye safka-i vâhide ile bey‘ edip kabz-ı semen-i ma‘dûd ve mebî‘-i mezbûrları mahallinde kabza mezbûrân Ahmed ve Ebûbekir’i taslît eyledim dedikde mukırr-ı merkūmun ikrârı meşrûhunu el-mukarru lehüma’l-mezbûrân Ahmed ve Ebûbekir bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’l-âhir min Cumâdelûlâ li sene semânin ve erba‘în ve elf.
Şuhûdü’l-hâl: Süleyman Efendi b. Mirza el-İmâm, Mehmed Beşe b. Abdullah, el-Hâc Hüseyin b. Abdullah, Hüseyin Beşe b. Abdullah, Hüseyin b. Yusuf, Ali b. Abdullah ve gayruhüm
|