|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 195 Hüküm no: 225 Orijinal metin no: [126-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Vefat eden İsa’nın zevcesi Emine’nin mehir, nafaka ve miras hissesini İsa’nın oğulları Veli Çelebi ve Hüseyin Çelebi’den aldığı
Havâss-ı aliyye kazâsı muzâfâtından Kağıthâne nâm karye kurbunda vâki‘ Kara Davud Paşa Bahçesi demekle ma‘rûf bahçede sâkin iken bundan akdem fevt olan İsa b. ( ) nâm müteveffânın zevce-i metrûkesi Emine bt. Abdullah nâm hâtun mahfil-i kazâda müteveffâ-yı mezbûrun sulbî oğulları olup muhallefâtına vaz‘-ı yed eden işbu râfi‘ay hâze’l-kitâb Veli Çelebi ve Hüseyin Çelebi nâm kimesneler mahzarında bi’t-tav‘i’s-sâf ikrâr ve takrîr-i kelâm edip müteveffâ-i mezbûrun zimmetinde olan iki yüz akçe mehr-i müeccelimi ve iddet nafaka-i mu‘ayyenemi ve müteveffâ-i mezbûrun muhallefâtından irs-i şer‘î ile bana isâbet eden eşyânın cümlesini bi’t-tamâm ve’l-kemâl mezbûrân Veli Çelebi ve Hüseyin Çelebi yedlerinden ahz u kabz eyleyip zimmetlerinde husûs-ı mezbûr[a] müte‘allik hakkım kalmadı dedikde mukırra-i merkūmenin ikrâr-ı meşrûhasını el-mukarru lehüma’l-mezbûrân Veli Çelebi ve Hüseyin Çelebi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâhiri Cumâdelâhire li sene semânin ve erba‘în ve elf.
Şuhûdü’l-hâl: Mahmud Efendi b. Mehmed el-İmâm, Mustafa Halîfe el-Müezzin, Halil Çelebi b. Hüdâverdi, Hüseyin Beşe b. Yusuf, Ömer b. Mahmud, Mahmud b. Ali, Süleyman b. İlyas, Hasan Çelebi b. Mehmed, Ömer Çelebi b. Mehmed, Ali Beşe b. Abdullah ve gayruhüm
|