.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 196
Hüküm no: 226
Orijinal metin no: [126-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Vefat eden Çeşme bt. Abdullah’tan Abdülbaki’ye intikal eden miras hissesini vasîsi Hatice bt. Abdullah’ın tahsil ettiği

Mahmiye-i İstanbul mahallâtından Çavuşbaşı mahallesinde sâkin iken bundan akdem vefât eden Mehmed Ağa b. Abdülmennân’ın sulbî sagīr oğlu Abdülbâkī’nin vasîyy-i şer‘îsi olan zevce-i metrûkesi Hatice bt. Abdullah nâm hâtun mahfil-i kazâda müteveffâ-yı mezbûrun mu‘takası olup Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkine iken fevt olan Çeşme bt. Abdullah nâm hâtunun muhallefâtının nısfına vâzı‘u’l-yed olan zevci Osman Bey b. Mustafa nâm serrâcın mahzarında bi’l-vesâye ikrâr ve takrîr-i kelâm edip müteveffâ-yı mezbûrenin muhallefâtının nısfı sagīr-i merkūma âid olmağın vesâyetim hasebiyle muhallefât-ı mezbûrenin nısfını merkūm Osman Bey yedinden muhallefât-ı merkūmdan bi’t-tamâm ve’l-kemâl ahz u kabz eyleyip sagīr-i merkūma âid mersûm Osman Bey yedinde bir şeyi kalmadı dedikde vasîyy-i mezbûrenin ikrâr-ı meşrûhasını el-mukarru lehü’l-mezbûr Osman Bey bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâhiri Cumâdelâhire li sene semânin ve erba‘în ve elf.


Şuhûdü’l-hâl: Mahmud Çelebi b. Mehmed serrâc-ı hâssa, Abdi Bey b. Şaban serrâc-ı hâssa, İbrahim Çelebi er-Râcil, Ali b. Abdullah