.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 197
Hüküm no: 229
Orijinal metin no: [127-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Menahim v. Hanka’nın ev yerini Mihayil v. Menahim ile kardeşleri Baroh ve Harsule’ye sattığı

Havâss kazâsına tâbi‘ Hasköy mahallâtından Ahmed Çelebi mahallesinde sâkin Menahim v. Hanka nâm Yahudi meclis-i şer‘-i hatîr-i lâzımü’t-tevkīrde Mihayil v. Menahim ve karındaşları Baroh ve Harsule nâm Yahudiler muvâcehesinde ikrâr ve takrîr-i kelâm edip mahalle-i mezbûrede vâki‘ [128] iki tarafı Hatice Hâtun mülkü ve bir tarafı müşterî-i mezbûrlar mülkleri ve bir tarafı Menahim nâm Yahudi vakfı olan menzil yeri ile mahdûd ve mezbûrûn Mihayil ve Baroh ve Harsule ile mâbeynimizde müşterek bi’r-i mâ’ı müştemil bi’r-i mâ’ı tarafından on zirâ‘ ve bir tarafdan on yedi zirâ‘ ve bir tarafdan yirmi zirâ‘ ve bir tarafdan münharifen yirmi zirâ‘ mülk menzil yerini ve mârrü’z-zikr bi’r-i mâ’ın nısf hisse-i şâyi‘amı ve muhavvatayı ve kuyuyu müştemil mülk menzil yerini mezbûrûn Mihayil ve Baroh ve Harsule’ye ale’l-iştirâki’s-seviy nakd-i râyic fi’l-vakt yedi bin akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim, ba‘de’l-yevm zikr olunan menzil yeri ve muhavvatası ile mezbûrûn Mihayil ve Baroh ve Harsule’nin mülk-i müşterâlarıdır keyfemâ yeşâ’ûn ve yehtârûn mutasarrıf olsunlar dedikde mukırr-ı merkūmun ikrâr-ı meşrûhunu el-mukarru lehümü’l-mezbûrûn Mihayil ve Baroh Harsule bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâhiri Recebi’l-ferd li sene semânin ve erba‘în ve elf.


Şuhûdü’l-hâl: Mehmed Beşe b. Veli, Ali Beşe b. Abdullah, Muslu b. Bayezid, Bünyamin v. Mosi, Yasef [v.] Salom, İlya v. Baroh