|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 199 Hüküm no: 232 Orijinal metin no: [129-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Vakfa ait boş arsanın mütevellî tarafından müzâyede ile kiralanması ve elde edilen gelir ile imam evinin tamir edilmesi
Havâss-ı aliyye kazâsına tâbi‘ Hasköy muzâfâtından Kağıthâne nâm karyede vâki‘ merhûme Ebe Hâtun vakfeylediği lede’l-ahâlî ve’l-cîrân ma‘lûmü’l-hudûd olan vakıf menzilde meşrûtiyyet üzre sâkin ve mütevellî olup karye-i mezbûrede vâki‘ Tâye Hâtun vakıf binâ eylediği câmi‘-i şerîfde imâm ve hatîb olan fahrü’l-e’immeti’l-kirâm Yusuf Efendi b. Behram mahfil-i kazâda işbu bâ‘isü’l-kitâb Çalabverdi Ahmed nâm kimesne mahzarında ikrâr ve takrîr-i kelâm edip karye-i mezbûrede iki tarafı menzil-i mezbûr ve bir tarafı mezbûr Çalabverdi Ahmed mülkü ve bir tarafı tarîk-i âm ile mahdûd ve mümtâz olup zikr olunan vakıf menzilin ocak duvarı ardında vâki‘ arzan bir zirâ‘ damlalık yerinden mâ‘adâsı tûlen bennâ zirâ‘ı ile on iki zirâ‘ ve yine menzil-i merkūmun cüneynesine muttasıl olan mahal dört zirâ‘ ve zikr olunan tarîk-i âm tarafı dokuz zirâ‘ bi-hesâb-ı şatrancî seksen yedi buçuk zirâ‘ arz-ı hâliye kat‘â intifâ‘ı olmadığı muhakkak olup ve menzil-i mezbûr dahi mürûr-ı eyyâm ile harâba müşrif ve meremmete muhtâc olduğu ecilden karye-i mezbûrede sâkin olanların ittifâkı ile zikr olunan arz-ı hâliye senevî kırk riyâlîye bey‘ olunup semeninden ve mukāta‘asından [130] hâsıl olan meblağ ile imâm süknâsı olan menzil-i mezbûr meremmet olunması evlâ ve enfa‘ olduğu ecilden beyne’t-tâlibîn beher sene kırk akçe mukāta‘a ile müzâyede olunup iki yüz akçe nakzını ve iki yüz akçe mukābelesinde zikr olunan arsayı cem‘an dört yüz akçede câr-ı mülâsıkı olan Çalab[verdi] Ahmed üzerinde karâr edip bir akçe ziyâde ile âhar zuhûr etmemeğin tevliyetim hasebiyle vech-i meşrûh üzre mezkûr Ahmed’e nakz-ı mezbûr bey‘ ve arsa-i merkūmeyi tefvîz eyledim mâdem ki beher sene ta‘yîn olunan kırk akçe mukāta‘asını cânib-i vakfa edâ eyleye âhardan kimesne dahl etmeyip keyfemâ yeşâ ve yehtâr mutasarrıf olsun dedikde mütevellî-i merkūmun kelimât-ı meşrûhasını el-mukarru lehü’l-mezbûr Çalabverdi Ahmed bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Tahrîren fî evâhiri Şa‘bâni’l-mu‘azzam li sene semânin ve erba‘în ve elf.
Şuhûdü’l-hâl: İbrahim Bey b. Mustafa es-Serrâc, Receb Çelebi b. Ali es-Serrâc, Ebûbekir Halîfe b. Receb el-İmâm, Süleyman Çelebi b. Ali el-Müezzin
|