|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 201 Hüküm no: 235 Orijinal metin no: [131-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Âişe bt. Mehmed’in mülk evini oğlu Mehmed b. Ömer’e hibe ettiği, oğlunun da karşılığında tasarrufundaki vakıf evi kendisine devrettiği
Havâss-ı aliyye kazâsına tâbi‘ Hasköy mahallâtından el-Hâc Şaban mahallesinde sâkine Âişe bt. Mehmed nâm hâtun meclis-i şer‘-i hatîr-i lâzımü’t-tevkīrde işbu râfi‘ü’l-kitâb sulbî oğlu Mehmed b. Ömer nâm kimesne mahzarında bi’t-tav‘i’s-sâf ikrâr ve takrîr-i kelâm edip mahalle-i mezbûrede vâki‘ silk-i mülkünde münselik olan iki tarafdan kendi mülkü ve bir tarafdan tarîk-i hâs ve bir tarafdan tarîk-i âm ile mahdûd ve mümtâz olan bir bâb fevkānî odayı ve bir bâb ahırı ve bir tahta bendi ve bir kenîfi ve bir bi’r-i mâ’ı ve hadîkayı müştemil olan mülk menzilini cümle tevâbi‘i ve levâhıkı ile oğlu mezbûr Mehmed’e ba‘de’t-tahliyeti’ş-şer‘iyye hibe-i sahîha-i şer‘iyye ile hibe ve temlîk ve teslîm edip ol dahi vech-i muharrer üzre meclis-i hibede zikr olunan menzili kabûl ve ittihâb ve kabz ve tesellüm ve temellük eyledi, ba‘de’l-yevm zikr olunan menzil oğlum merkūm Mehmed’in mülk-i mevhûbudur keyfemâ yeşâ ve yehtâr mutasarrıf olsun dedikden sonra mukābele-i hibede Mahmiye-i İstanbul mahallâtından Ahırkapısı kurbunda Mehmed Paşa mahallesinde vâki‘ bir tarafdan Hüseyin Bey mülkü ve bir tarafdan Ebûbekir Bey mülkü ve bir tarafdan Solak Mahmud Bey mülkü ve bir tarafdan tarîk-i âm ile mahdûd ve mümtâz olan merhûm ve mağfûrun-leh Mehmed Paşa Vakfı’ndan icâre-i mu‘accele ve her yevm dört akçe icâre-i müeccel[e] ile taht-ı tasarrufunda olan bir bâb fevkānî odayı ve bir bâb tahtânî odayı ve bir bâb ahırı ve bir kenîfi ve tahta bendi müştemil olan vakıf menzili vakf-ı mezbûrun mütevellîsi izniyle hakk-ı tasarrufunu bana ıvazan ferâğat edip ben dahi zikr olunan vakıf menzili hibe-i merkūmeden ıvaz aldım dedikde mukırra-i merkūmenin ikrâr-ı meşrûhasını el-mukarru lehü’l-mezbûr [132] Mehmed bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Ve hurrire fi’l-yevmi’l-hâmis ve’l-ışrîn min Şa‘bâni’l-mu‘azzam li sene semânin ve erba‘în ve elf.
Şuhûdü’l-hâl: Ahmed Efendi b. Abdi el-İmâm, Mahmud Çelebi b. Mehmed es-Serrâc, Mustafa Çelebi b. Halil es-Serrâc, Mehmed Halîfe b. İbrahim el-Müezzin, Abdi b. Şaban es-Serrâc, Mustafa b. Nurullah, Ali Dede b. Hüseyin, Ebûbekir b. Ömer, Ali Beşe b. Abdullah ve gayruhüm
|