|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 202 Hüküm no: 236 Orijinal metin no: [132-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ahmed Ağa b. Musa Paşa vefat ettiği için vakfa intikal eden tasarrufundaki vakıf kiremit fırını hissesinin Yorgi v. Karaca’ya icâreteynle tefvîz edildiği
Mahrûse-i İstanbul’da vâki‘ merhûm Defterdâr İbrahim Efendi Vakfı’na evlâddan olu[p] meşrûtiyyet üzre mütevellî olan fahrü’l-a‘yân Mahmud Çelebi b. Mehmed meclis-i şer‘-i şerîfde Yorgi v. Karaca nâm zimmî mahzarında bi’t-tav‘i’s-sâf ikrâr ve takrîr-i kelâm edip vakf-ı mezbûrdan Hazret-i Ebâ Eyyûb el-Ensârî -aleyhi rahmetü Rabbihi’l-Bârî- kazâsına tâbi‘ Hasköy mahallâtından Ahmed Çelebi mahallesinde vâki‘ bir tarafı sâhil-i bahr ve bir tarafı sâbıkan Sekbânbaşı olan Kasım Ağa mülkü ve bir tarafı mütevellî-i mezbûr mülkü ve ba‘zan Ahmed Çelebi Câmi‘i haremi ve ba‘zan tarîk-i âm ve bir tarafı Kethüdâ Kadın Vakfı ile mahdûd bir bâb kiremitçi fırını ve alât ve levâzım ve tevâbi‘-i ma‘lûmesinin sekiz sehminden bir buçuk sehmini icâre-i mu‘accele ve müeccele ile tasarrufunda olan Ahmed Ağa b. merhûm Musa Paşa fevt olup tasarrufunda olan bir buçuk sehim vakfa intikāl edip zikr olunan bir buçuk sehmi icâre-i mu‘accele ile îcâr olunmak vakfa enfa‘ olmağın mezbûr Yorgi’ye yüz bin nakd-i râyic fi’l-vakt akçe icâre-i mu‘accele ve beher şehr doksan üçer buçuk akçe icâre-i müeccele ile tevliyetim hasebiyle îcâr edip mezbûr Yorgi dahi istîcâr ve kabûl ettikden sonra zikr olunan yüz bin akçe icâre-i mu‘acceleyi vakıf için ahz u kabz eyledim, ba‘de’l-yevm zikr olunan fırının sekiz sehimden bir buçuk sehmi mezbûr Yorgi’nin müfevvazıdır dedikde, mütevellî-i merkūmun ikrâr-ı meşrûhunu el-mukarru lehü’l-mezbûr Yorgi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâmis ve’l-ışrîn min Şa‘bâni’l-mu‘azzam li sene semânin ve erba‘în ve elf.
Şuhûdü’l-hâl: Derviş Mehmed Bey b. Abdüsselam, Osman Beşe b. Abdullah er-Râcil, Osman b. el-Hâc Ebûbekir, Ahmed b. el-Hâc Ebûbekir, Abdurrahman b. Mehmed, Mustafa Çelebi b. Abdullah er-Râcil, Kurd b. el-Hâc Mehmed, Mustafa Çelebi b. Derviş Mehmed, Rıdvan b. Abdullah, Ali b. Abdullah
|