|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 203 Hüküm no: 238 Orijinal metin no: [133-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ekmekçi Yorgi’nin Yorgi v. Yani’den alacak davasında sulh oldukları
Ekmekçi tâ’ifesinden Yorgi v. Kondivi nâm zimmî mahfil-i kazâda işbu râfi‘-i hâze’s-sifr Yorgi v. Yani nâm zimmî muvâcehesinde ikrâr ve takrîr-i kelâm edip mezbûr Yorgi zimmetinde karz-ı şer‘îden beş yüz yetmiş akçe hakkımı da‘vâ ve taleb edi[p] suâl olundukda mezbûr Yorgi inkâr ile cevâb verip beynimizde münâza‘ât-ı kesîre ve muhâsamât-ı şedîde olmuşdu, el-hâletü hâzihî beynimize muslihûn tavassut edip ve yüz elli akçeye inkârdan sulh eylediklerinde ben dahi sulh-ı mezbûru kabûl ve bedel-i sulh olan yüz elli akçeyi mezbûr Yorgi yedinden bi’t-tamâm ahz u kabz eyleyip husûs-ı mezbûre müte‘allik cemî‘ de‘âvî ve mutâlebâtdan ve eymândan zimmetini ibrâ ve ıskāt eyledim dedikde mukırr-ı merkūmun ikrâr-ı meşrûhunu el-mukarru lehü’l-mezbûr bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Tahrîren fî evâhiri Recebi’l-ferd sene semânin ve erba‘în ve elf.
|