|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 203 Hüküm no: 239 Orijinal metin no: [134-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Emine bt. Mehmed’in evini Osman Beşe b. Hüseyin’e sattığı ve bedelini tahsil ettiği
Havâss-ı aliyye kazâsı muzâfâtından Hasköy mahallâtından Turşucu mahallesinde sâkine Emine bt. Mehmed nâm hâtun meclis-i şer‘-i hatîr-i lâzımü’t-tevkīrde işbu râfi‘ü’l-kitâb Osman Beşe b. Hüseyin nâm kimesne mahzarında bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafı Emine bt. Ferhad nâm hâtun mülkü ve bir tarafı Hasan b. Abdullah mülkü ve bir tarafı İbrahim b. ( ) mülkü ve bir tarafı bâyi‘-i mezbûre mülküne muttasıl bir bâb beyt-i süflîyi ve eşcâr-ı müsmire ve gayr-ı müsmireyi müştemil olan mülk menzilimi mezbûr Osman’a fıddî râyic fi’l-vakt beş bin akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ol dahi vech-i mübeyyen üzre iştirâ ve tesellüm eyledi ba‘de’l-yevm zikr olunan menzil-i mezbûr Osman’ın mülk-i müşterâsıdır keyfemâ yeşâ ve yehtâr mutasarrıf olsun dedikde mukırra-i merkūmenin minvâl-i muharrer üzre sudûr ve zuhûr eden ikrâr ve i‘tirâfın el-mukarru lehü’l-mezbûr Osman bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Şa‘bâni’l-mu‘azzam sene semânin ve erba‘în ve elf.
Şuhûdü’l-hâl: Mehmed Bey b. Mustafa bevvâb-ı sultânî, Hasan Beşe b. Abdullah, Ali Beşe b. Abdullah, Nasuh b. Mehmed, Mehmed b. Abdullah, Murad b. Abdurrahman, Mustafa b. Abdullah, Hüseyin b. Yusuf ve gayruhüm
|