.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 205
Hüküm no: 244
Orijinal metin no: [135-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Cihan bt. Abdullah’ın Latef v. Serkis’deki alacağı için yüz yirmi gün vade tanıdığı ve borcuna karşılık evini rehin olarak aldığı

Havâss-ı aliyye kazâsına tâbi‘ Hasköy mahallâtından Pîrî Paşa mahallesinde sâkin Ermeni tâ’ifesinden Latef v. Serkis nâm Ermeni meclis-i şer‘-i hatîr-i lâzımü’t-tevkīrde işbu râfi‘atü’l-kitâb Cihan bt. Abdullah nâm hâtun mahzarında bi’t-tav‘i’s-sâf ikrâr ve takrîr-i kelâm edip mezbûre Cihan nâm hâtuna cihet-i karz-ı şer‘îden on sekiz bin nakd-i râyic fi’l-vakt akçe deynim olup lâkin târih-i kitâbdan yüz yirmi güne değin müeccel eyledik, müddet-i mezbûre tamâmında meblağ-ı mezbûr on sekiz bin akçe zimmetimde lâzımü’l-edâ ve vâcibü’l-kazâ deynimdir dedikden sonra mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd olan mülk menzilimi meblağ-ı mezkûr on sekiz bin akçe için mezbûre Cihan nâm hâtunun yedine rehin vaz‘ eyledim dedikde, mukırr-ı merkūmun ikrâr-ı meşrûhunu el-mukarru leha’l-mezbûre Cihan bi’l-muvâcehe tasdîk ettikden sonra mahalle-i mezbûrede sâkin Tatyos v. Latef nâm Ermeni menzil-i merkūmun derkine emr-i kabûlü hâviye kefâlet ile kefîl oldukda mâ hüve’l-vâki‘ bi’t-taleb ketb olundu. Tahrîren fi’l-yevmi’t-tâsi‘ ve’l-ışrîn min Şa‘bâni’l-mu‘azzam li sene semânin ve erba‘în ve elf.


Şuhûdü’l-hâl: Mehmed Efendi b. Abuzer, Ali Beşe b. Abdullah, Danik? v. Mandavık?, Serkis v. Ones? ve gayruhüm