.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 206
Hüküm no: 245
Orijinal metin no: [135-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Çalabverdi Ahmed’in tasarrufundaki vakıf arâziyi mütevellî izniyle Korucu Ahmed’e devrettiği

Havâss-ı aliyye kazâsına tâbi‘ Hasköy muzâfâtından Kağıthâne nâm karyede sâkin Çalabverdi Ahmed b. ( ) nâm kimesne mahfil-i kazâda işbu râfi‘ü’l-kitâb Korucu Ahmed b. ( ) nâm kimesne mahzarında ikrâr ve takrîr-i kelâm edip merhûme Ebe Hâtun Vakfı’ndan olup karye-i mezbûrede vâki‘ bir tarafı bâyi‘-i mezbûr mülkü ve iki tarafı sâkin olduğu vakıf menzil ve bir tarafı tarîk-i âmma müntehî ve beher sene kırk akçe mukāta‘a ile taht-ı tasarrufunda vakıf olan arz-ı hâliye [136] vakf-ı mezbûrun mütevellîsi olan Yusuf Efendi b. Behram ma‘rifetiyle mezbûr Korucu Ahmed’e tefvîz edip mukābele-i tefvîzde yedinden ( ) akçe alıp kabz eyledim ba‘de’l-yevm zikr olunan vakıf arz-ı hâliye mezbûr Korucu Ahmed’in taht-ı tasarrufundadır dedikde mukırr-ı merkūmun ikrâr-ı meşrûhunu el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’t-tâsi‘ ve’l-ışrîn min Şa‘bâni’l-mu‘azzam li sene semânin ve erba‘în ve elf.


Şuhûdü’l-hâl: İbrahim Bey b. Mustafa es-Serrâc, Receb Çelebi b. Ali es-Serrâc, Ebûbekir Halîfe b. Receb el-İmâm, Süleyman Çelebi b. Ali el-Müezzin