.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 207
Hüküm no: 247
Orijinal metin no: [136-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Eski Eflak voyvodasının vefat eden Yanaki v. Andon’daki alacak davasında sulh oldukları

Sâbıkan Eflah voyvodası olan Londo? Voyvoda v. İstefani Voyvo[da] tarafından vech-i âtî üzre sulh ve ibrâya vekîl olup Mahmiye-i İstanbul’da Karabaş mahallesinde sâkin Yamandi v. Tanaş ve Hazret-i Eyyûb Ensârî kapısı dâhilinde Mustafa Paşa mahallesinde sâkin Foti v. Şepras? nâm zimmîler şehâdetleriyle isbât-ı vekâlet eden Nikola v. Yani mahfil-i kazâda mahmiye-i mezbûrede Pero kapısı dâhilinde sâkin iken hâlik olan Yanaki v. Andon nâm zimmînin hasran vârisesi ve muhallefâtına vâzı‘atü’l-yed olduğu şer‘an mütehakkik olan sulbiye kızı Ezmerağda nâm Nasrâniyye tarafından ikrâr-ı âti’l-beyânı tasdîke sâbitü’l-vekâle vekîl olup ve hâlik-i mezbûrun dahi muhallefâtına vaz‘-ı yed eden zevci Aleksandra v. Yanaki nâm zimmî muvâcehesinde [137] ikrâr ve takrîr-i kelâm edip hâlik-i mezbûr zimmetinde müvekkilemin deyn-i şer‘îden yüz kırk bin akçe hakkı olup kable’l-îfâ hâlik olmağın muhallefâtından vekâletim hasebiyle taleb eylediğimde meblağ-ı mezbûru mezbûrân bi’l-külliye inkâr edip isbâtdan âciz olmağla beynimizde münâza‘ât-ı kesîre ve muhâsamât-ı şedîde vâkı‘a olmuşdu, el-hâletü hâzihî mâbeynimize muslihûn tavassut edip meblağ-ı mezbûru elân iki bin akçeye inşâ’-i akd-i sulh eylediklerinde ben dahi vekâletim hasebiyle sulh-ı mezbûru kabûl ve bedel-i sulh olan meblağ-ı mezbûru merkūmân Aleksandıra ve Ezmerağda’nın yedlerinden bi-tamâmihî alıp kabz edip meblağ-ı mezbûre ve gayra müte‘allik olan da‘vâdan merkūmân Aleksandıra ve Ezmerağda’nın zimmetlerini ibrâ-i âmm-ı kātı‘ü’n-nizâ‘la ibrâ ve ıskāt eyledim ba‘de’l-yevm mazmûn-ı kitâba muhâlif benden veya müvekkilimden bizzat veya bi’l-vâsıta da‘vâ sudûr ederse lede’l-hükkâmi’l-kirâm mesmû‘a ve makbûle olmasın dedikde vekîl-i mezbûr Aleksandıra’dan tasdîk-i mu‘teber sudûr etmeğin mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâdis min Ramazâni’l-mübârek li sene semânin ve erba‘în ve elf.


Şuhûdü’l-hâl: Mehmed Çavuş b. Abdullah el-Mübâşir, Ahmed Beşe b. Abdullah er-Râcil, Ali Beşe b. Abdullah, Mihal v. Yani, Dimitriyaki? kasab-ı meydan, Senahed? v. Vasil, Angeli v. Mavrodi, Arestehos? v. Dimitri, Todori v. Dimitri, Deni? kasab-ı meydan