.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 208
Hüküm no: 249
Orijinal metin no: [137-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Aynî bt. Abdullah’ın muhtelif eşyayı Ümmühânî bt. Musa’ya hibe ettiği

Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkine Aynî bt. Abdullah nâm hâtun meclis-i şer‘-i hatîr-i lâzımü’t-tevkīrde işbu râfi‘atü’l-kitâb Ümmühânî bt. Musa nâm hâtun mahzarında bi’t-tav‘i’s-sâf ikrâr ve takrîr-i kelâm edip silk-i mülkünde münselik olan bir köhne beledî döşek ve bir köhne yorgan ve bir köhne kilim ve iki yastık ve bir sahan ve bir tencere mezbûre Ümmühânî Hâtun’a hibe-i sahîha-i şer‘î ile hibe ve temlîk ve teslîm edip ol dahi vech-i muharrer [138] üzre meclis-i hibede eşyâ-i mezkûreyi kabûl ve ittihâb ve kabz ve tesellüm ve temellük eyledi ba‘de’l-yevm eşyâ-i mezkûre merkūme Ümmühânî’nin mülk-i mevhûbesidir keyfe mâ teşâ ve tahtâr mutasarrıfa olsun dedikde mukırra-i merkūmenin ikrâr-ı meşrûhasını el-mukarru leha’l-mezbûre Ümmühânî bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’t-tâsi‘ aşer min Ramazâni’l-mübârek li sene semânin ve erba‘în ve elf.


Şuhûdü’l-hâl: Osman b. Abdullah, Ali Beşe b. Kenan, Mehmed b. Cafer, Ali b. Musa, Ali b. Abdullah