|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 209 Hüküm no: 251 Orijinal metin no: [138-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kostantin v. Andriye’nin Salamon v. Gelson’a olan borcu için yüz gün vade verildiği
Mahmiye-i İstanbul hısnı ebvâbından Fener kapısı dâhilinde Abdi Subaşı mahallesinde sâkin Kostantin v. Andriye nâm zimmî meclis-i şer‘-i hatîr-i lâzımü’t-tevkīrde işbu râfi‘-i hâze’s-sifr Salamon v. Gelson nâm Yahudi muvâcehesinde bi’t-tav‘i’s-sâf ikrâr ve takrîr-i kelâm edip mezbûr Salamon’a cihet-i karz-ı şer‘îden zimmetimde üç bin akçe deynim olup lâkin deyn-i mezbûru târih-i kitâbdan yüz gün tamâmına değin müeccel eyledik yüz gün tamâmında zimmetimde vâcibü’l-edâ ve lâzımü’l-kazâ deynimdir dedikde mukırr-ı merkūmun ikrâr-ı meşrûhunu el-mukarru lehü’l-mezbûr Salamon bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’l-ışrîn min Ramazâni’l-mübârek li sene semânin ve erba‘în ve elf.
Şuhûdü’l-hâl: Mustafa Bey b. Mehmed, Mehmed Beşe b. Abdullah, Kebirpo v. Manol er-Reis ve gayruhüm
|