.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 210
Hüküm no: 253
Orijinal metin no: [139-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Tamke bt. Derviş’in mülk bağını Hacik v. Bahâdır’a satıp bedelini tahsil ettiği

Vilâyet-i Anadolu’da vâki‘ Eğin kazâsına tâbi‘ Çukur nâm karye sükkânından olup hâlen Havâss-ı aliyye kazâsına tâbi‘ Hasköy’de Abdüsselam mahallesinde sâkine Tameke bt. Derviş nâm zimmîyyenin tarafından husûs-ı âti’l-beyânı ikrâra vekîl olup Hacik v. Nihabet ve Nursuz v. Pîrli nâm zimmîler şehâdetleri ile vekâleti sâbite olan zevci Aleksi v. Serkis nâm zimmî meclis-i şer‘-i hatîr-i lâzımü’t-tevkīrde işbu râfi‘-i hâze’s-sifr Hacik v. Bahâdır nâm zimmî muvâcehesinde bi’l-vekâle ikrâr ve takrîr-i kelâm edip müvekkilem mezbûrenin silk-i mülkünde muntazam olup kazâ-i mezbûra tâbi‘ Venk nâm karye sınırında vâki‘ bir tarafdan Cafer b. Abdullah bağı ve bir tarafdan Keşiş bağı ve bir tarafdan mâ’-ı cârî ve bir tarafdan tarîk-i âm ile mahdûd ve mümtâz olan mülk bağını mezbûr Hacik’e nakd-i râyic fi’l-vakt yüz elli riyâlî guruşa bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve mebî‘-i mezbûru mahallinde kabza taslît eyledi, ol dahi vech-i mübeyyen üzre iştirâ ve tesellüm eyledi ba‘de’l-yevm zikr olunan bağ merkūm Hacik’in mülk-i müşterâsıdır keyfemâ yeşâ ve yehtâr mutasarrıf olsun dedikde vekîl-i merkūmun ikrâr-ı meşrûhunu el-mukarru lehü’l-mezbûr Hacik [140] bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâmis min Şevvâli’l-mükerrem li sene semânin ve erba‘în ve elf.


Şuhûdü’l-hâl: Osman Beşe b. Abdullah er-Râcil, Mustafa b. Nasuh, Aydın [b.] Mehmed, Nord? v. Uryek?, Mağsub? v. Ağanes?, Tepegöz, Civan v. Fedi?, Nusyek? v. Ağanes?, Gazal? v. Keşiş, Arzhan? v. Emircan, Toğol? v. Cafer, Murad v. Agnad?