.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 212
Hüküm no: 256
Orijinal metin no: [141-1, Arapça]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


İsmihânî bt. el-Hâc Mehmed’in zevci Mehmed b. Süleyman’dan muhâlaa ile boşandığı

Hazret-i Ebâ Eyyûb el-Ensârî tevâbi‘inden Hasköy mahallâtından Turşucu mahallesinde sâkine İsmihânî bt. el-Hâc Mehmed nâm hâtun kıbelinden hul‘ ve ibrâ-i âti’z-zikri ikrâra vekîli olup vekâleti müvekkile-i mezbûreyi ma‘rifet-i şer‘iyye ile ârifân olan Ahmed Efendi b. Abdi ve Ali Dede b. Hüseyin’in şehâdetleriyle sâbite olan Mehmed Halîfe b. Haydar nâm kimesne tağyîr ve tahrîfden korunmuş olan meclis-i şer‘-i şerîf ve mahfil-i dîn-i münîfde ikrâr ve i‘tirâf etti ki, müvekkile-i mezbûre hâmil-i hâze’l-kitâb zevci Mehmed b. Süleyman ile muhâla‘a oldukda ol dahi onunla nikâhlarında ma‘kūdun aleyh olan mikdârı ve nisâbı râyic fi’l-vakt üç bin akçe fıddî-i Osmânî olan mehr-i müecceli ve aralarında ilm-i şer‘î ile mukaddere ve ma‘lûme olan nafaka-i iddeti mukābilinde muhâla‘a-i sahîha-i şer‘iyye oldukda akd-i cedîd ve sadâk-ı müste’nef olmaksızın kendisine helâl olmayacak şekilde bâyin olduğunu ikrâr ettikde zevc-i mezbûr tarafından dahi tasdîk olundukdan sonra her biri âharın zimmetini cemî‘ de‘âvî ve mutâlebâtdan, eymân ve husûmâtdan umûmen ve husûsan hukūk-ı zevciyyete müte‘allik de‘âvîden ibrâ-i âmm-ı kātı‘ü’[n-nizâ‘] ve râfi‘ün li’ş-şikāk ile ibrâ ettiler. Cerâ zâlike ve hurrire fi’l-yevmi’s-sâlis ve’l-ışrîn min Şevvâli’l-mükerrem sene semânin ve erba‘în ve elf.


Şuhûdü’l-hâl: İbrahim Efendi b. Hüsrev el-İmâm, İbrahim Efendi b. Hüseyin, Musa b. Abdi, Osman b. Hüseyin, Hasan Dede b. Uğurlu, Sevindi b. Pîrî, Ali b. Abdullah, Hamid b. Hacı, Hüseyin Beşe b. Abdullah, Ahmed Bey b. Abdullah, Hüseyin b. Ahmed, Mehmed Çelebi b. Mustafa ve gayruhüm mine’l-hâzırîn