.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 213
Hüküm no: 257
Orijinal metin no: [141-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Seyyid Mehmed b. Seyyid Hüseyin’in darp edildiğine dâir davada Kirbaki’nin zimmetini ibrâ ettiği

Havâss-ı aliyye kazâsına tâbi‘ Hasköy’de sâkin Seyyid Mehmed b. Seyyid Hüseyin nâm kimesne meclis-i şer‘-i hatîr-i lâzımü’t-tevkīrde işbu râfi‘-i hâze’s-sifr zimmî tâ’ifesinden Kirbaki v. Andreya nâm zimmî muvâcehesinde bi’t-tav‘i’s-sâf ikrâr ve takrîr-i kelâm edip bundan akdem mezbûr bi-gayr-ı vechin şer‘î beni tabanca ile darb etti deyû da‘vâ eylemiş idim el-hâletü hâzihî zikr olunan da‘vâ-yı mezkûrdan mezbûr zimmînin zimmetini ibrâ-i âm ile ibrâ ve ıskāt-ı tâm ile ıskāt eyledim ba‘de’l-yevm husûs-ı mezbûra müte‘allik benden veyâhud vekîlimden da‘vâ ve nizâ‘ [142] sudûr ve zuhûr ederse lede’l-hükkâmi’l-kirâm mesmû‘a ve makbûle olmaya dedikde mukırr-ı merkūmun ikrâr-ı meşrûhunu el-mukarru lehü’l-mezbûr Kirbaki bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî târihi’l-mezbûr sene 1048.


Şuhûdü’l-hâl: Mustafa Bey b. Mehmed, Mustafa b. Abdullah, Arslan b. Murad, Ali b. Mustafa, Ali b. Abdullah