.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 213
Hüküm no: 258
Orijinal metin no: [142-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Seyyid Mehmed’in Puna v. Kemal’den alacak iddiasını şahitlerin çelişkili ifâdeleri yüzünden ispat edemediği

Havâss-ı aliyye kazâsına tâbi‘ Hasköy mahallâtından Sütlüce mahallesinde sâkin Seyyid Mehmed Efendi b. Seyyid Sinan nâm kimesne meclis-i şer‘-i hatîr-i lâzımü’t-tevkīrde Mahmiye-i İstanbul’da sâkin Katalan cemâ‘atinden hâmil-i hâze’l-kitâb Puna v. Kemal nâm Yahudi muvâcehesinde üzerine da‘vâ ve takrîr-i kelâm edip mezbûr Puna zimmetinde bundan akdem benden müşterâ ve makbûzu olan dört yüz zirâ‘ atlas ve [i]brişim raht semeninden yüz beş bin fıddî râyic fi’l-vakt akçe hakkım vardır suâl olunup alıverilmesin taleb ederim dedikde, gıbbe’s-suâl ve akībe’l-inkâr müdde‘î-i merkūmdan müdde‘âsını mütebeyyine beyyine taleb olundukda ihzâr ettiği şâhidlerinin tenâkuzları zâhir olmağın şehâdetleri makbûle olmayıp mâ hüve’l-vâki‘ bi’t-taleb ketb olundu. Tahrîren fî târihi’l-mezbûr li sene semânin ve erba‘în ve elf.


Şuhûdü’l-hâl: Mehmed Efendi b. Abuzer, Hüseyin b. Mustafa, Ali b. Abdullah, Mehmed b. Abdullah, Ali b. ( ) ve gayruhüm