|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 213 Hüküm no: 259 Orijinal metin no: [142-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kiremitçilik yapan Onnes v. Emircan’ın talebi ile ölen ortağı Harib v. Asuzader’in hissesinin tespiti
Vilâyet-i Anadolu’da vâki‘ Eğin kazâsına tâbi‘ Gemürgâp nâm karyeden olup hâlen Havâss-ı aliyye kazâsına tâbi‘ Hasköy mahallâtından Turşucu mahallesinde vâki‘ kiremit fırınında kiremitçi iken mürd olan Harib v. Asuzader nâm Ermeni’nin kiremitçilik san‘atında şerîki olan Onnes v. Emircan nâm Ermeni mahfil-i kazâya gelip takrîr-i kelâm edip mürd-i mezbûr hâlik olduğu eyyâmda âyin-i bâtılımız üzre kendi mâlımdan sekiz bin akçe harc u sarf edip ve fırın-ı mezbûrda mürd-i merkūmun hissesine isâbet eden harc-ı nîme tuğla yirmi üç bin altı yüz tuğla mevcûd olup fırın-ı mezbûrda zikr olunan tuğlayı sayıp vukūfu olan kiremitçilerden [143] istihbâr olunmak matlûbumdur dedikde kiremitçi tâ’ifesinden Mustafa Çelebi b. Abdullah ve Ferhad v. Şahbaz ve Asuzader? v. Mirek? alâ tarîki’ş-şehâde meclis-i şer‘a hâzırûn olup fi’l-hakīka fırın-ı mezbûrda mürd-i merkūmun hissesine isâbet edip hâlen mevcûd bulduğumuz harc-ı nîme tuğla yirmi üç bin altı yüz tuğladır deyû ihbâr ettiklerinde mâ hüve’l-vâki‘ bi’t-taleb ketb olundu. Tahrîren fî târihi’l-mezbûr li sene semânin ve erba‘în ve elf.
Şuhûdü’l-hâl: Muzaffer Çavuş b. Abdullah, Ali b. Abdullah, Mehmed b. Abdullah, Mıgırdiç v. Asuzader?
|