|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 214 Hüküm no: 261 Orijinal metin no: [143-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Halebe v. Harto’nun kefil olduğu borç için otuz üç gün vade verildiği ve Sultane bt. Yani’nin de borca kefil olduğu
Mumcu tâ’ifesinden Halebe v. Harto nâm zimmî mahfil-i kazâda Kemal v. Mosi nâm Yahudi muvâcehesinde bi’t-tav‘i’s-sâf ikrâr ve takrîr-i kelâm edip mezbûr Kemal’in gāib ani’l-meclis olan Yanapot v. ( ) nâm zimmî zimmetinde yağ bahâsından dört bin dört yüz kırk akçe hakkı olup meblağ-ı mezbûre ben tarafeynden emr-i kabûlü hâviye kefâletle kefîl olmuşdum, lâkin meblağ-ı mezbûr[u] târih-i kitâbdan otuz üç güne değin müeccel [144] eyledi, otuz üç gün tamâmında meblağ-ı mezbûr kefâletim hasebiyle zimmetimde lâzımü’l-edâ ve vâcibü’l-kazâ deynimdir dedikde, mukırr-ı merkūmun ikrâr-ı meşrûhunu el-mukarru lehü’l-mezbûr Kemal bi’l-muvâcehe tasdîk ettikden sonra Mahmiye-i İstanbul’da Eski Cum‘a Pazarı kurbunda sâkine Sultane bt. Yani Nasrâniyye meblağ-ı mezbûra tarafeynden emr-i kabûlü hâviye kefâletle kefîl oldukda mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ ve’l-ışrîn min Şevvâli’l-mükerrem li sene semânin ve erba‘în ve elf.
Şuhûdü’l-hâl: Mustafa çorbacı, Es-Seyyid Hızır Çelebi b. Zekeriya, Veli Beşe b. İbrahim, Ahmed b. Mehmed, Ali b. Abdullah
|